Tau Salamo 111:1-10
111 HALELUIA. To fakaheke au kia Iehova mo e loto katoa ke he toloaga he tau tagata tututonu, katoa mo e fakapotopotoaga.
2 Kua lalahi ni e tau gahua ne eke e Iehova, ha ha ne kumi e lautolu oti kana kua fiafia ki ai.
3 Ko e hana tau gahua ko e tau mena haia. ke fakaheke ki ai, mo e tau mena fulufuluola, to tumau foki hana tututonu tukulagi.
4 Kua eke mo fakamanatuaga hana tau mana; kua fakaalofa noa mai a Iehova, kua fakaalofa hofihofi ni.
5 Kua foaki mai e ia e mena ke kai a lautolu kua matakutaku kia ia; to manatu e ia hana maveheaga tukulagi.
6 Kua fakakite atu e mana he hana tau gahua ke he hana motu, kia ta atu e ia kia lautolu e fonua he tau motu kehe.
7 Ko e tau gahua he hana tau lima ko e moli ia mo e tonu; kua fakamoli ni hana tau fekau oti kana.
8 Kua fakamau e tau mena ia ke tukulagi tukumuitea; kua eke ke he fakamoli mo e tonu.
9 Ne uta e ia e palepale ke he hana motu; ne kotofa e ia hana maveheaga ke tukulagi; kua tapu mo e matakutakuina hana higoa.
10 Ko e matakutaku kia Iehova, ko e kamataaga ia he iloilo; ha i ai e loto manamanatu hifo mitaki ia lautolu oti kua eke e tau mena ia; to tumau tukulagi hana fakahekeaga.