Tau Salamo 114:1-8
114 NE fina atu a Isaraela mai Aikupito, ko e faoa a Iakopo mai he motu vagahau kehe;
2 Ti eke ai a Iuta mo motu tapu hana, ko Isaraela, ko e motu ke pule a ia ki ai.
3 Kua kitia he tahi ti hola ni a ia; ne liu ki tua a Ioritana.
4 Ne hopohopo e tau mouga tuga ne tau mamoe tane, mo e tau matiketike tuga ne tau punua mamoe.
5 Ko e tahi na e, ko e heigoa kia e mena ne hola ai a koe? Ma Ioritana na e, ko e ha kia ne liu a koe ki tua?
6 Ko e tau mouga na e, ko e ha kia ne hopohopo ai a mutolu tuga ne tau mamoe tane? mo mutolu e tau matiketike tuga ne tau punua mamoe?
7 Ko e kelekele na e, kia vivivivi a koe ki mua he Iki, ki mua he Atua a Iakopo;
8 Ko ia ne faliu e maka tumau ke eke mo loloto vai; ko e maka uli foki ke eke mo vai puna.