Tau Salamo 115:1-18
115 AUA neke tuku mai kia mautolu, Iehova na e; aua neke tuku mai kia mautolu, ka kia tuku atu e fakahekeaga ke he hāu a higoa; ha ko e hāu a fakaalofa mo e hāu a fakamoli.
2 Ke talahau mo ha e tau motu kehe, Ko fe ha lautolu a Atua?
3 Ka ko e ha mautolu a Atua, ha he lagi ni a ia; kua eke e ia e tau mena oti kua finagalo a ia ki ai.
4 Ko e ha lautolu a tau tupua, ko e ario mo e auro ia, ko e gahua he tau lima he tau tagata.
5 Kua fai gutu a lautolu, ka e nakai ni vagahau; kua fai mata a lautolu ka e nakai ni kitekite;
6 Kua fai teliga a lautolu, ka e nakai ni fanogonogo; kua fai ihu a lautolu, ka e nakai ni hohogi;
7 Kua fai lima a lautolu, ka e nakai ni toto mena; kua fai hui a lautolu, ka e nakai ni fano; kua nakai fai leo ke he tau kakia ha lautolu.
8 To tuga na lautolu e tau tagata ne eke e tau mena ia, ti pihia mo lautolu oti kana kua tua ki ai.
9 Isaraela na e, kia tua a koe kia Iehova; ko ia ni ko e ha lautolu a lagomatai, mo e akau punuti ha lautolu.
10 Ko e faoa a Arona na e, kia tua a mutolu kia Iehova; ko ia ni ko e ha lautolu a lagomatai, mo e akau punuti ha lautolu.
11 Ko mutolu na kua matakutaku kia Iehova, kia tua a mutolu kia Iehova; ko ia ni ko e ha lautolu a lagomatai, mo e akau punuti ha lautolu.
12 Kua manatu mai a Iehova kia tautolu; to fakamonuina mai e ia; to fakamonuina mai e ia e faoa a Isaraela; to fakamonuina e ia e faoa a Arona.
13 To fakamonuina e ia a lautolu kua matakutaku kia Iehova, ko e tau lalo tagata katoa mo e tau iki.
14 Kia lafilafi e Iehova kia mutolu, ko mutolu katoa mo e ha mutolu a fanau.
15 Kua monuina a mutolu ia Iehova, ko ia ne eke e lagi katoa mo e lalolagi.
16 Ko e lagi, ko e lagi ni, ha Iehova ia; ka kua tuku mai e ia e lalolagi ke he fanau he tau tagata.
17 Nakai fakaheke kia Ioha a lautolu kua mamate, mo lautolu oti kua o hifo ke he mena fakafenono.
18 Ka ko tautolu nai, to fakamonu a tautolu kia Ioha, ke kamata ainei, ti hoko ke he tukulagi. Haleluia.