Tau Salamo 118:1-29
118 FAKAHEKE a mutolu kia Iehova, ha kua mitaki ni a ia; ha kua tukulagi ni hana fakaalofa.
2 Kia pehe atu a Isaraela, kua tukulagi ni hana fakaalofa.
3 Kia pehe atu e faoa a Arona, kua tukulagi ni hana fakaalofa.
4 Kia pehe atu a lautolu kua matakutaku kia Iehova, kua tukulagi ni hana fakaalofa.
5 Ne ui atu e au kia Ioha ke he haku a matematekelea; ti fanogonogo mai a Ioha kia au, mo e ta mai e ia au ke he mena laulahi.
6 Ha ha ia au a Iehova; nakai matakutaku au; ko e heigoa ha mena ke eke he tau tagata kia au?
7 Ha ha ia au a Iehova ke fakalataha mo lautolu kua lagomatai mai kia au; ka ko au, to kitia ni e au e taui kia lautolu kua fakavihia au.
8 Kua mua e mitaki he tua kia Iehova ke he falanaki ke he tau iki.
9 Kua mua e mitaki he tua kia Iehova ke he falanaki ke he tau tagata.
10 Kua agaagai mai kia au e tau motu kehe oti; ko e higoa a Iehova ke fakaotioti ai e au a lautolu.
11 Kua agaagai mai a lautolu kia au, kua agaagai mai ni kia au; ko e higoa a Iehova ke fakaotioti ai e au a lautolu.
12 Kua agaagai mai kia au a lautolu tuga ne tau lago meli; to tamate a lautolu tuga ne afi kua tafu ke he tau akau mahukihuki; ko e higoa a Iehova ke fakaotioti ai e au a lautolu.
13 Ne tulei fakalahi mai a koe kia au, kia veli ai au; ka kua lagomatai mai a Iehova kia au.
14 Ko Ioha ko e haku a malolo a ia, mo e haku a lologo, kua eke foki a ia mo fakamouiaga kia au.
15 Ha he tau fale ie he tau tagata tututonu e leo he kalaga fiafia mo e fakamouiaga. Ko e lima matau a Iehova ko e toa ia.
16 Kua nikiti ki luga e lima matau a Iehova; ko e lima matau a Iehova ko e toa ia.
17 Nakai mate ni au, ka e moui ni au mo e tokutoku atu e au e tau mena ne eke e Ioha.
18 Kua akonaki fakalahi au e Ioha; ka e nakai tuku atu au ke he mate.
19 Kia hafagi mai ā kia au e tau gutuhala he tututonu; to hu atu ai au, mo e fakaheke atu kia Ioha.
20 Ko e gutuhala a Iehova hanai, ke huhu, atu ai e tau tagata tututonu.
21 To fakaheke au kia koe; ha kua fanogonogo mai a koe kia au, kua eke foki a koe mo fakamouiaga kia au.
22 Ko e maka ne tiaki he tau tagata ati fale, kua eke ia mo maka he malokuaga tapa ki luga.
23 Ko e mena ia ne eke e Iehova; ko e mena ke ofomate ai a tautolu ka kitekite ki ai.
24 Ko e aho nai ne eke e Iehova; kia kolikoli a tautolu mo e fiafia ki ai.
25 Iehova na e, kua ole lalo atu au ke fakamoui au; kua ole atu au, Iehova na e, ke fakamonuina mai.
26 Kia monuina a ia kua haele mai ke he higoa a Iehova; kua fakamonuina atu e mautolu a mutolu mai he fale a Iehova.
27 Ko e Atua ko Iehova ia kua fakamaama mai kia tautolu; kia lili ke he tau toua e poa, ato hoko ke he tau hoe he fatapoa.
28 Ko e haku Atua ni a koe, to fakaheke au kia koe; ko e haku Atua a koe to nava atu au kia koe.
29 Fakaheke ā mutolu kia Iehova, ha kua mitaki ni a ia; ha kua tukulagi ni hana fakaalofa.