Tau Salamo 119:1-176
119 UHOAKI a lautolu kua hakohako ha lautolu a puhala, ko lautolu kua o fano ke he fakatufono a Iehova.
2 Uhoaki a lautolu kua omaoma ke he hana tau talahau, ko lautolu kua kumi kia ia mo e loto katoa;
3 Kua nakai eke e lautolu ha mena kelea; kua o a lautolu ke he hana tau puhala.
4 Ko koe ni ne poaki mai ke omaoma fakaoti ke he hāu a tau fekau;
5 Kua manako lahi au ke fakamau haku a tau mahani ke omaoma ke he hāu a tau fakatufono.
6 Ti nakai mā ai au, ka manatu e au ke he hāu a tau poaki oti kana.
7 To fakaaue au kia koe mo e loto fakamoli, ka ako e au hāu a tau fakafiliaga tonu.
8 To omaoma e au hāu a tau fakatufono; aua neke tiaki muatua e koe au.
9 To eke ha kia e fuata ke fakamea hana tau mahani? Kia leoleo ki ai ke lata mo e hāu a tau kupu.
10 Ne kumi atu e au kia koe mo e haku a loto katoa; aua neke hehe au ke he hāu a tau poaki.
11 Ne tuku e au hāu a tau vagahau ke he loto haku, neke hala au ki mua hāu.
12 Kia fakamonu kia koe Iehova na e, kia fakaako e koe au ke he hāu a tau fakatufono.
13 Ne talahau atu ke he haku tau laugutu e tau fakafiliaga oti he hāu a fofoga.
14 Ne fiafia au ke he puhala he hāu a tau fakatufono, kua mua ke he tau koloa oti.
15 To manamanatu au ke he hāu a tau fekau, mo e manatu au ke he hāu a tau puhala.
16 Kua fiafia ni au ke he hāu a tau fakatufono; nakai nimo ia au hāu a tau kupu.
17 Kia totonu mai a koe ke he hāu a fekafekau, kia moui ai au, mo e omaoma ke he hāu a tau kupu.
18 Kia fakamaama e koe haku tau mata, kia kitia ai e au e tau mena ke ofo ai ke he hāu a fakatufono.
19 Ko e tagata kehe au ke he lalolagi; aua neke fufu e koe ia au hāu a tau poaki.
20 Kua mate au he manako lahi ke he hāu a tau fakafiliaga ke he tau aho oti kana.
21 Ne akonaki e koe a lautolu ne fakatokoluga, ko lautolu ne ulaafia, ko lautolu kua hehe ke he hāu a tau poaki.
22 Kia uta kehe e koe ia au e mā mo e fakavihia; ha kua omaoma e au ke he hāu a tau talahau.
23 Ne nonofo e tau iki ti fevagavagahauaki a lautolu kia au; ka kua manamanatu hāu a fekafekau ke he hāu a tau fakatufono.
24 Ko e hāu a tau talahau ko e haku a fiafia ni a ia, ko e haku a tau ekepule ia.
25 Kua pipiki haku a loto ke he kelekele; kia fakamoui mai e koe au ke lata mo e hāu a kupu.
26 Ne talahau atu e au haku a tau mahani; ne fanogonogo mai foki a koe kia au; kia fakaako au ke he hāu a tau fakatufono.
27 Kia fakakite mai e koe kia au e puhala he hāu a tau fekau; to manamanatu e au hāu a tau mana.
28 Kua tagi ni hoku loto he fakaatukehe; kia fakamalolo e koe au ke lata mo e hāu a kupu.
29 Kia uta kehe e koe ia au e mahani pikopiko; kia foaki mai foki e koe kia au hāu a fakatufono mo e fakaalofa.
30 Kua fifili e au e puhala he fakamoli; kua tuku e au hāu a tau fakafiliaga ki mua haku.
31 Kua pipiki atu e au ke he hāu a tau fakatufono; Iehova na e, aua neke fakamā e koe au.
32 To poi au ke he puhala he hāu a tau poaki, ka vevete e koe haku loto.
33 Iehova na e, kia fakakite mai e koe e puhala he hāu a tau fakatufono, ti omaoma ai e au, ato hoko ke he fakahikuaga.
34 Kia fakamaama mai kia au, ti omaoma ai e au hāu a fakatufono, mo e fifitaki ki ai ke he loto katoa.
35 Kia takitaki e koe au ke he puhala he hāu a tau poaki; ha kua fiafia ni au ki ai.
36 Kia fakahagao e koe hoku loto ke he hāu a tau fakatufono, ka e aua neke hagao ke he velevelemena.
37 Kia fakamafoki kehe e koe hoku mata neke kitekite ke he tau mena nakai aoga: kia fakamalolo e koe au ke he hāu a puhala.
38 Kia fakamoli e koe hāu a vagahau ke he hāu a fekafekau, ko ia kua matakutaku kia koe.
39 Kia fakamafoki kehe e koe haku a mā, kua matakutaku au ki ai; ha kua mitaki hāu a tau fakafiliaga.
40 Kitiala, kua manako lahi au ke he hāu a tau fekau; kia fakamalolo e koe au ke he hāu a tututonu.
41 Kia hoko mai foki kia au hāu a fakaalofa, Iehova na e, ko e hāu a fakamouiaga ke lata mo e hāu a vagahau.
42 Ti fai kupu au ke tali age kia ia kua fakafiu mai kia au; ha kua tua au ke he hāu a kupu.
43 Aua foki neke uta kehe fakaoti e koe e kupu moli mai he gutu haku; ha kua amaamanaki au ke he hāu a tau fakafiliaga.
44 Ti omaoma ai e au ke he hāu a fakatufono nakai noa, ti tukulagi tukumuitea.
45 To evaeva foki au ke he mena pulahi; ha kua kumi ni e au hāu a tau fekau.
46 To vagahau foki e au ke he hāu a tau talahau ki mua he tau patuiki; ti nakai mā ai au.
47 To fiafia foki au ke he hāu a tau poaki, ne manako lahi au ki ai.
48 To nikiti ki luga foki au haku tau lima ke he hāu a tau poaki, kua manako lahi ki ia au; ti manamanatu ni au ke he hāu a tau fakatufono.
49 Kia manatu e koe hāu a kupu ke he hāu a fekafekau, ha kua fakatupu e koe haku a amaamanaki.
50 Ko ia ne mafanatia ai au ke he haku a matematekelea; ha ko e hāu a kupu ni kua fakamoui au.
51 Kua tauamuamu fakalahi kia au he tau tagata fakatokoluga; nakai mafoki kehe au mo e hāu a fakatufono.
52 Iehova na e, kua manatu au ke he hau a tau fakafiliaga tali mai i tuai, ti mafanatia ai au.
53 Kua moua au he vale lahi, ha kua tiaki he tau tagata mahani kelea hāu a fakatufono.
54 Ko e tau fakatufono hāu kua eke ia mo tau lologo maku ke he fale kua api ai au.
55 Iehova na e, kua manatu e au hāu a higoa ke he po, mo e omaoma e au ke he hāu a fakatufono.
56 Ha ia au e mena ia ha kua omaoma e au ke he hāu a tau fekau.
57 Iehova na e, kua eke tuai a koe maku, ne pehe atu au, To taofi e au hāu a tau kupu.
58 Kua olelalo atu au ki ho mua mo e haku a loto katoa; kia fakaalofa mai a koe kia au ke lata mo e hāu a vagahau.
59 Ne manamanatu e au ke he haku tau mahani, ti liliu atu ai haku tau hui ke he hāu a tau talahau.
60 Ne alumaki au, ti nakai fakatalē ke omaoma ke he hāu a tau poaki.
61 Kua agaagai au he tau hele he tau tagata mahani kelea; kua nakai nimo ia au hāu a fakatufono.
62 To ala au ke he tuloto po ke fakaaue atu ai kia koe, ha ko e hāu a tau fakafiliaga tonu.
63 Kua kapitiga au mo lautolu oti kua matakutaku kia koe, mo lautolu kua omaoma ke he hāu a tau fekau.
64 Iehova na e, kua puke e lalolagi ke he hāu a fakaalofa; kia fakaako e koe au ke he hāu a tau fakatufono.
65 Kua mahani mitaki mai a koe ke he hāu a fekafekau, ke lata mo e hāu a kupu.
66 Kia fakaako e koe au ke he loto matala mitaki mo e pulotu; ha kua talia fakatonu e au hāu a tau poaki.
67 Ne hehe au ke he vaha nakai la matematekelea ai au; ka ko ainei, kua omaoma e au ke he hāu a vagahau.
68 Kua mitaki a koe, ti kua mahani mitaki a koe; kia fakaako e koe au ke he hāu a tau fakatufono.
69 Kua fafati he tau tagata fakatokoluga e tala pikopiko kia au; ka ko au, kua omaoma au ke he hāu a tau fekau mo e haku a loto katoa.
70 Kua gako ha lautolu a tau loto tuga ne gako; ka ko au, kua fiafia ni au ke he hāu a fakatufono.
71 Kua aoga kia au he matematekelea au, kia ako ai e au hāu a tau fakatufono.
72 Kua mua e mitaki kia au e fakatufono he hāu a fofoga ke he tau auro mo e tau ario afe mo afe.
73 Ko e hāu a lima ni ne eke au mo e taute au; kia foaki mai e iloilo kia au, kia ako ai e au hāu a tau poaki.
74 Ko lautolu ne matakutaku kia koe, ka kitia e lautolu au, ti fiafia ai a lautolu; ha kua amaamanaki au ke he hāu a kupu.
75 Iehova na e, kua iloa e au kua tonu ni hāu a tau fakafiliaga, ne fakamatematekelea e koe au ke he fakamoli.
76 Kia eke hāu a fakaalofa mo mena ke mafanatia ai au, ke lata mo e hāu a vagahau ke he hāu a fekafekau.
77 Kia hoko mai kia au hāu a fakaalofa hofihofi, ti moui ai au; ha ko e hāu a fakatufono, ko e haku a fiafia ia.
78 Kia mā e tau tagata fakatokoluga, ha kua fakavai teao e lautolu au; ka e manamanatu au ke he hāu a tau fekau.
79 Kia mafoki mai kia au a lautolu kua matakutaku kia koe, katoa mo lautolu kua iloa hāu a tau talahau.
80 Kia hakohako haku a loto ke he hāu a tau fakatufono kia nakai mā ai au.
81 Kua mate au he fia eke e fakamouiaga mai ia koe; kua amaamanaki foki au ke he hāu a kupu.
82 Kua poko haku tau mata he fia kitia hāu a vagahau, ti pehe atu au, To fakamafana mai e koe au a fe?
83 Pete ni he eke au tuga ni e lupo kili manu ke he ahua afi, ka e nakai nimo ia au hāu a tau fakatufono.
84 Fiha kia e aho he hāu a fekafekau? To eke a fe e koe e fakafiliaga kia lautolu kua favale mai kia au?
85 Kua keli luo he tau tagata fakatokoluga mo au, kua nakai lata ia mo e hāu a fakatufono.
86 Ko e hāu a tau poaki oti ko e fakamoli ia; kua favale teao mai a lautolu kia au; kua lagomatai mai a koe kia au.
87 Toe tote to keli au e lautolu ke he motu; ka ko au, nakai tiaki e au hāu a tau fekau.
88 Kia fakamalolo e koe au ke lata mo e hāu a fakaalofa, ti omaoma ai e au ke he fakatufono he hāu a fofoga.
89 Iehova na e, kua fakamau ke he lagi hāu a kupu ke tukulagi.
90 Ke hahau mo hahau hāu a fakamoli; ne fakamau e koe e lalolagi, ti tumau ai ni.
91 Ha ko e hāu a pule kua tumau ai e tau mena ia ke he aho nai; ha ko e hāu a tau fekafekau e tau mena oti ia.
92 Aua he eke hāu a fakatufono mo fiafia haku, po kua mate tuai au ke he haku a matematekelea.
93 Nakai nimo tukulagi ia au hāu a tau fekau; ha ko e tau mena ia ne fakamalolo ai e koe au.
94 Ha ia koe ni au, kia fakamoui mai e koe au; ha kua kumi e au ke he hāu a tau fekau.
95 Kua amaamanaki e tau tagata mahani kelea kia keli e lautolu au; kua manamanatu e au hāu a tau talahau.
96 Kua kitia tuai e au e fakahikuaga he tau mena oti kua katoatoa e mitaki; ko e hāu a poaki kua laulahi mahaki ia.
97 Kua lahi ni haku a manako ke he hāu a fakatufono; kua manamanatu au ki ai ke he aho oti.
98 Ko e hāu a tau poaki kua mua ai haku a iloilo kia lautolu kua fai fi kia au; ha kua ha ha ia au tukulagi ni a ia.
99 Kua mua haku a pulotu kia lautolu oti kua fakaako mai kia ua; ha ko e hāu a tau fakatufono kua manamanatu ki ai au.
100 Ko e haku a loto matala kua mua ia ke he tau patu, ha kua omaoma e au ke he hāu a tau fekau.
101 Kua kalo kehe haku tau hui mo e tau puhala kelea oti kana, kia taofi ai e au hāu a kupu.
102 Nakai fano kehe au mo e hāu a tau fakafiliaga, ha kua fakaako e koe au.
103 Kua humelie na ati kehe hāu a tau vagahau ke he haku a gutu; kua mua ni ke he meli ke he haku a gutu.
104 Ko e hāu a tau fekau kua moua ai e au e lotomatala; ko e mena ia kua vihiatia ai e au e tau mahani pikopiko oti.
105 Ko e hāu a kupu ko e hulu ia ke he haku tau hui, mo e maama ke he haku puhala.
106 Ne omonuo au, ti fakamoli foki, to omaoma au ke he hāu a tau fakafiliaga tonu.
107 Kua matematekelea lahi na au; Iehova na e, kia fakamalolo e koe au ke lata mo e hāu a kupu.
108 Iehova na e, kia talia e koe e tau poa kua eke mo e loto kua tala atu ai haku gutu, mo e fakaako au ke he hāu a tau fakafiliaga.
109 Ha he lima haku e moui haku nakai noa; ka e nakai nimo ia au hau a fakatufono.
110 Kua eke he tau tagata mahani kelea e hele ke hele ai au; ka e nakai hehe au ke he hāu a tau fekau.
111 Kua eke mo mena toka mau haku hāu a tau fakatufono tukulagi; ha ko e tau mena ia kua fiafia ai hoku loto.
112 Kua fakahagao e au haku loto ke eke hāu a tau fakatufono ke tukulagi tukumuitea.
113 Kua vihiatia e au e tau tagata hikihikifano, ka e manako lahi au ke he hāu a fakatufono.
114 Ko e haku a fakamumuliaga a koe mo e haku a akau punuti; kua amaamanaki au ke he hāu a kupu.
115 Kia o kehe ia au a mutolu kua mahani kelea; to omaoma e au ke he tau poaki he Atua haku.
116 Kia tokotū e koe au ke lata mo e hāu a kupu, kia moui au; aua foki neke mā au ke he haku a amaamanaki.
117 Kia tokotū e koe au, ti fakamoui ai au; to hagao atu au ke he hāu a tau fakatufono nakai noa.
118 Kua fakalialia e koe a lautolu oti kana kua hehe ke he hāu a tau fakatufono; ha ko e pikopiko ni ha lautolu a fakavai,
119 Kia uta kehe e koe e tau tagata mahani kelea ha he motu, tuga ne otaota; ko e mena ia kua manako lahi ai au ke he hāu a tau talahau.
120 Kua memege haku kakano he matakutaku kia koe, kua matakutaku foki au ke he hāu a tau fakafiliaga.
121 Kua eke e au e fakafiliaga tonu mo e mahani tututonu; aua neke tuku atu e koe au kia lautolu kua favale mai kia au.
122 Kia eke a koe mo lagomatai ke he hāu a fekafekau ki a mitaki ai au; aua neke favale mai kia au e tau tagata fakatokoluga.
123 Kua poko haku tau mata he fia kitia hāu a fakamouiaga, mo e hāu a vagahau tututonu.
124 Kia eke e koe ke he hāu a fekafekau ke lata mo e hāu a fakaalofa; kia fakaako foki e koe au ke he hāu a tau fakatufono.
125 Ko e hāu a fekafekau au nai, kia foaki mai e koe kia au e loto matala, kia iloa ai e au hāu a tau talahau.
126 Kua hoko mai tuai e vaha ke gahua ai a Iehova; kua holia e lautolu hāu a fakatufono.
127 Ko e mena ia kua mua ai haku a manako ke he hāu a tau poaki, ke he tau auro ko e tau auro mitaki ni.
128 Ko e mena ia kua manatu ai au kua tonu hāu a tau fekau oti kana ni; kua vihiatia e au e tau mahani pikopiko oti.
129 Ko e tau mena ke ofomate ai hāu a tau fakatufono, ko e mena ia kua omaoma ki ai haku loto.
130 Ko e fakakiteaga he hāu a tau kupu kua maamatia ai, kua moua ai he tau tagata goagoa e loto matala.
131 Kua fakamaga haku gutu mo e faguhē, ha kua manako lahi au ke he hāu a tau poaki.
132 Kia hagao mai a koe kia au, mo e fakaalofa noa mai kia ua, ke tuga ne mahani hāu kia lautolu kua fiafia ke he hāu a higoa.
133 Kia fakamau e koe hakua tau tuagahui ke he hāu a vagahau; aua foki neke kautu ha mahani kelea kia au.
134 Kia laveaki e koe au mai he favale he tau tagata; ti taofi ai e au hāu a tau fekau.
135 Kia fakakikila mai hāu a fofoga ke he hāu a fekafekau; mo e fakaako au ke he hāu a tau fakatufono.
136 Kua lele hifo e tau vai lele ke he haku mata, ha kua nakai omaoma a lautolu ke he hāu a tau fakatufono.
137 Kua tututonu ni a koe, Iehova na e, kua tonu foki hāu a tau fakafiliaga.
138 Ne poaki mai e koe hāu a tau talahau mo e tonu, mo e fakamoli ni.
139 Kua mate na au he haku a fakamakutu, ha kua nimo hāu a tau kupu e lautolu ne favale mai.
140 Kua fakamoli ni hāu a vagahau; kua fiafia foki ki ai hāu a fekafekau.
141 Ko e tagata fakateaga au mo e fakalialia; ka e nakai nimo ia au hāu a tau fekau.
142 Ko e tututonu hāu kua tututonu tukulagi ia; ko e mena moli foki hāu a fakatufono.
143 Kua moua au he matematekelea mo e mamahi; ko e hāu a tau poaki kua fiafia au ki ai.
144 Kua tonu hāu a tau fakatufono tukulagi ni; kia foaki mai e koe e loto matala kia au, ti moui ai au.
145 Kua ui atu au kia koe mo e loto katoa; Iehova na e, kia fanogonogo mai a koe kia au; to omaoma ni au ke he hāu a tau fakatufono.
146 Kua ui atu au kia koe; kia fakamoui e koe au, ti taofi ai e au hāu a tau talahau.
147 Kua mua au ke he matafatafa ata he aho ke kalaga atu kia koe; kua amaamanaki au ke he hāu a tau kupu.
148 Kua mua haku tau mata ke ala ka e nakala hoko ke he tau leoleoaga he po, kia manamanatu ai au ke he hāu a vagahau.
149 Kia fanogonogo mai a koe ke he haku a leo ke lata mo e hāu a fakaalofa; Iehova na e, kia fakamalolo e koe au ke lata mo e hāu a fakafiliaga.
150 Kua fakatata mai a lautolu kua tutuli e mahani kelea; kua vaha mamao a lautolu mo e hāu a fakatufono.
151 Kua tata mai a koe, Iehova na e; ko e hāu a tau poaki oti foki kua moli ia.
152 Tali mai i tuai kua iloa ai e au hāu a tau talahau, kua fakamau ni e koe ke tumau tukulagi.
153 Kikite mai a ke he haku a matematekelea, mo e laveaki e koe au; ha kua nakai nimo ia au hāu a fakatufono.
154 Kia eke e koe haku a taufetoko, mo e laveaki au; kia fakamalolo e koe au ke lata mo e hāu a vagahau.
155 Kua vaha mamao e tau tagata mahani kelea mo e fakamouiaga; ha kua nakai kumi e lautolu hāu a tau fakatufono.
156 Iehova na e, kua lahi e fakaalofa hohofi hāu; kia fakamalolo au ke lata mo e hāu a tau fakafiliaga.
157 Kua tokologa a lautolu kua favale mai mo e ita mai kia au; ka e nakai mafoki kehe na au mo e hāu a tau fakatufono.
158 Ne kitia e au e tau tagata fakavai, mo e vihiatia ni e au, ko lautolu kua nakai taofi ke he hāu a vagahau.
159 Kikite mai a ke he haku a manako lahi ke he hāu a tau fekau; Iehova na e, kia fakamalolo au ke lata mo e hāu a fakaalofa.
160 Kua moli ni hāu a tau kupu tali mai he kamataaga; to tukulagi foki hāu a tau fakafiliaga tonu oti kana.
161 Kua favale teao mai e tau iki kia ua; ka kua hopo haku ate ke he hāu a tau kupu.
162 Na fiafia au ke he hāu a vagahau, tuga ne tagata kua moua e tau mena fofo loga.
163 Ko e tau kupu pikopiko kua vihiatia e au, kua vihiatia lahi ai e au; ka e manako au ke he hāu a fakatufono.
164 Takilagafitu ni ke he aho ke fakaheke atu ai e au kia koe, ha ko e hāu a tau fakafiliaga tonu.
165 Kua lahi e mafola ha lautolu kua manako lahi ke he hāu a fakatufono; ti nakai fai mena ke tupetupe ai a lautolu.
166 Iehova na e kua amaamanaki au ke he hāu a fakamouiaga, kua eke foki au hāu a tau poaki.
167 Kua taofi haku loto ke he hāu a tau talahau; mo e manako lahi ue atu au ki ai.
168 Kua omaoma e au ke he hāu a tau fekau, katoa mo e hāu a tau talahau; ha ko e mena ha i mua hāu haku a tau mahani oti kana.
169 Iehova na e, kia hoko atu haku a tagi ki mua hāu; kia foaki mai e loto matala kia au ke lata mo e hāu a kupu.
170 Kia hoko atu ki mua hāu haku a ole atu; kia laveaki e koe au ke lata mo e hāu a vagahau.
171 To talatala atu he haku tau laugutu e fakahekeaga, to fakaako e koe au ke he hāu a tau fakatufono.
172 Kia tali atu haku alelo ke he hāu a vagahau, ha kua tonu hāu a tau poaki oti kana.
173 Kia eke hāu a lima mo lagomatai kia au; ha kua fifili e au hāu a tau fekau.
174 Iehova na e, kua manako lahi au ke he hāu a fakamouiaga; ko e hāu a fakatufono foki ko e haku a fiafia ia.
175 Kia moui au ni, kia fakaheke atu ai au kia koe; kia lagomatai mai foki hāu a tau fakafiliaga kia au.
176 Ne fano kehe au tuga ne mamoe hehe; kia kumi mai e koe hāu a fekafekau; ha kua nakai nimo ia au hāu a tau poaki.