Tau Salamo 132:1-18
132 IEHOVA na e, kia manatu e koe a Tavita ke he hana matematekelea oti kana;
2 Ne omonuo ai a ia kia Iehova, mo e eke e omonuo ke he Atua malolo a Iakopo;
3 Ne pehe age, Nakai fano ni au ke he fale ie he haku a fale, nakai hake ni au ke he haku a mohega, ko e mena ke mohe ai au;
4 Nakai maeke e au ke mohe haku tau mata, ti nakai mohe foki haku tau tuamata.
5 Ato moua e au ha mena ke haele ai a Iehova, ko e haeleaga ma e Atua malolo a Iakopo.
6 Kitiala, ne fanogonogo a tautolu ki ai i Efarata; ne moua ai e tautolu ke he fonua he kavei.
7 Ati o a tautolu ke he hana haeleaga, kia hufeilo a tautolu ki mua he fakatuaga ve hana.
8 Iehova na e, kia tu atu a koe ke he hāu a okiokihaga, ko koe mo e puha he hāu a malolo.
9 Kia tapulu hāu a tau ekepoa ke he tututonu, kia kalaga fiafia foki hāu a tau tagata tapu.
10 Aua neke fakahaga kehe e koe e mata hana ne fakauku e koe, ha ko Tavita hāu a fekafekau.
11 Ne omonuo e Iehova kia Tavita ke he fakamoli, nakai hiki e ia, To fakanofo e au ke he hāu a nofoaiki e taha he fanau he hāu a tino.
12 Kaeke ke taofi hāu a fanau ke he haku a maveheaga, mo e haku a tau talahau ka fakaako ai e au a lautolu, ti nonofo ai ni ha lautolu a fanau ke he hāu a nofoaiki tukulagi ni.
13 Ha kua fifili e Iehova a Siona; kua finagalo ki ai a ia mo haeleaga hana.
14 Ko e haku a okiokihaga tukulagi hanai; ko e mena nai ke nofo ai au ha kua manako au ki ai.
15 To fakamonuina fakalahi e au hana tau mena kai; to fakamakona e au hana tau tagata nonofogati ke he areto.
16 To fakatapulu e au hana tau ekepoa ke he fakamouiaga; to kalaga fiafia fakalahi hana tau tagata tapu.
17 To fakatupu ai foki e hoe ma Tavita; kua taute tuai e au e lamepa mo ia kua fakauku e au.
18 To fakatapulu e au ke he mā a lautolu kua fai fi kia ia; ka e kikila mai hana foufouiki ki luga ia ia.