Tau Salamo 139:1-24
139 IEHOVA na e, kua kumikumi e koe au, ti kua fioia ni e koe au.
2 Ko koe ni kua fioia haku a nofo ki lalo mo e haku a tu mai ki luga; kua fioia fakamamao e koe haku a manamanatu.
3 Kua kumi ni e koe haku a puhala mo e haku a takotoaga, kua mahani a koe mo e haku a tau puhala oti kana.
4 Nakai fakai ha kupu ke he gutu haku, kitiala, Iehova na e kua fioia fakaoti ai e koe.
5 Kua pa takai e koe au ki tua haku katoa mo mua haku; kua fakalago foki e koe hāu a lima ki luga ia au.
6 Ko e iloilo ia kua mua he uka kia au, kua tokoluga, nakai maeke ia au.
7 To fano au ki fe mai hāu a Agaga? To hola au ki fe mai mua hāu?
8 Kaeke ke hake au ke he lagi, ko koe haia; kaeke ke faliki haku mohega i seoli, kitiala, ko koe haia.
9 Ka eke e au e tau tapakau he matafatafa ata, ka nofo au ke he fakahikuaga he tahi;
10 To takitaki e koe au ke he mena ia ni ke he hāu a lima, ti toto ni au he hāu a lima matau.
11 Ka pehe atu au, To ufitia au he pouli; ti eke ai e po mo maama ke agaagai kia au.
12 Ha ko e pouli nakai pouli ia kia koe; to maama ni e po tuga ne aho; kua tatai ni kia koe e pouli mo e maama.
13 Ha ko e mena ha ia koe haku a manamanatu; ne ufiufi e koe au ke he manava he haku a matua fifine.
14 Kua fakaaue au kia koe, ha ko e mena eke au kia matakutakuina mo e ofo ki ai; ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.
15 Kua nakai galo haku tino kia koe, ka kua eke au ke he mena galo, ka kua taute au ke he tau mena hokulo he lalolagi.
16 Ne fioia he na fofoga hāu haku a tino oti ka e nakai la mau; kua tohi oti foki ke he hāu a tohi, kua taute e tau aho ka e nakai la ha i ai taha.
17 Ko e Atua na e, kua uhoaki ni kia au hāu a tau manamanatu, kua loga ue atu e katoatoa ha lautolu ka lafilafi.
18 Ka totou ai e au kua loga ni ka e gahoa e oneone; ka ala na au, kua fakalataha agaia a taua mo koe.
19 Ko e moli, ko e Atua na e, to kelipopo e koe e tau tagata mahani kelea; ko e hanai, kia o kehe ia au a mutolu ko e tau tagata limatoto;
20 Kua vagahau a lautolu kia koe ke fakatupu ai e kelea; kua totoku noa e lautolu hāu a higoa ha kua fai fi a lautolu kia koe.
21 Iehova na e, nakai kia vihiatia e au a lautolu kua vihiatia a koe? ko lautolu foki kua tutu atu kia koe nakai kia fakavihia fakalahi e au?
22 Kua vihiatia ni e au a lautolu mo e vihiatia fakalahi ni; kua eke tuai a lautolu mo tau fi haku.
23 Ko e Atua na e, kia kumi e koe kia au mo e kitekite ke he hoku loto; kia kamatamata e koe au mo e kitekite ke he haku a manamanatu.
24 Mo e kitekite kia au po ke ne ha ia au ha mahani ke mamahi ai; kia takitaki foki e koe au ke he puhala tukulagi.