Tau Salamo 140:1-13
140 IEHOVA na e, laveaki e koe au mai he tagata mahani kelea; kia leoleo e koe au mai he tagata favale;
2 Ko lautolu kua manamanatu mena kelea ke he tau loto ha lautolu, mo e fakapotopoto ke tau ke he aho oti.
3 Kua fakamatila e lautolu ha lautolu a tau alelo, tuga ni e gata; ha i lalo foki he tau laugutu ha lautolu e mena kona he tau asipi. Sila.
4 Iehova na e, kia leveki e koe au neke hoko mai e tau lima he tau tagata mahani kelea, kia leoleo e koe au ha ko e tagata favale kua eke ke fakatupetupe haku tau hui.
5 Kua fufu he tau tagata fakatokoluga e matahele maku, katoa mo e tau toua; kua fofola e lautolu e kupega ke he kauhala; kua tuku e lautolu e tau mena ke tauhele aki au. Sila.
6 Ne pehe atu au kia Iehova, Ko koe ni ko e haku a Atua; Iehova na e, kia fofoga mai a koe ke he leo he haku a ole atu.
7 Iehova na e, ko e Iki, ko e haku a fakamouiaga malolo, kua eke a koe mo mena ke malu ai haku ulu ke he aho ne tau ai.
8 Iehova na e, aua neke āge e koe ke he tagata mahani kelea e tau mena ne manako ki ai; aua foki neke maeke e koe ke hoko hana lagatau, neke fakatokoluga a lautolu. Sila.
9 Ko e tau ulu ha lautolu kua pa takai kia au, to ufitia ia he kelea mai he tau laugutu ha lautolu ni.
10 To liti ki luga ia lautolu e tau malala kaka, to palu a lautolu ke he afi, ke he tau mena hokulo, nakai tuai tutu mai ai a lautolu.
11 Nakai tumau ke he motu e tagata kupu kelea; ko e tagata favale to tutuli a ia he kelea ato matepopo ni.
12 Kua iloa ni e au to fetoko ni e Iehova ma e tagata matematekelea, to eke fakafiliaga ma e tau tagata nonofogati.
13 Ko e moli, to fakaheke e tau tagata tututonu ke he higoa hāu; to nonofo ki mua hāu a lautolu kua mahani hakohako.