Tau Salamo 143:1-12
143 IEHOVA na e, kia fanogonogo mai a koe ke he haku a liogi; kia haga mai hāu a na teliga ke he haku a ole atu; kia tali mai kia au ke he hāu a fakamoli mo e hāu a tututonu.
2 Aua neke fakahoko e koe e fakafiliaga ke he hāu a fekafekau, ha kua nakai fai tagata moui ke tututonu ki mua hāu.
3 Ha kua tutuli au he tagata ne fai fi kia au; kua malipilipi au ke he kelekele; kua fakanofo e ia au ke he pouli, tuga na lautolu kua leva tuai mamate.
4 Kua lolelole ai haku a loto ia au; kua fakahakuhaku haku a loto ki loto ia au.
5 Kua manatu e au e tau aho ne aho mua; kua manamanatu e au ke he tau mena oti ne eke e koe; kua manamanatu e au e tau gahua he hāu a tau lima.
6 Kua fakaolo atu haku tau lima kia koe, kua manako ni au kia koe tuga, ne motu kua nakai fai vai. Sila.
7 Iehova na e, kia fakaave a koe ke fanogonogo mai kia au, ha ko e oti ne fai haku a moui; aua neke haga kehe hāu a fofoga ia au, neke tuga a lautolu kua hifo ke he luo au nai.
8 Kia logona e au hāu a fakaalofa ke he mogoho pogipogi; ha kua tua ni au kia koe; kia fakakite mai e puhala ke fano ai au; ha kua manako lahi haku a loto kia koe.
9 Iehova na e, kia laveaki e koe au mai ia lautolu kua fai fi kia au; kua fakamumuli au kia koe.
10 Kia fakaako mai e koe au ke eke hāu a finagalo; ha ko koe ni ko e haku a Atua; kia takitaki au he hāu a Agaga mitaki ke he kelekele molemole.
11 Iehova na e, kia fakamalolo e koe au ha ko e hāu a higoa; kia uta kehe e koe e matematekelea ia au ha ko e hāu a tututonu.
12 Ha ko e hāu a fakaalofa kia fakahiku e koe a lautolu kua fai fi kia au; kia fakaotioti foki e koe a lautolu oti kana kua favale kia au; ha ko au ko e hāu a fekafekau au nai.