Tau Salamo 145:1-21
145 HAKU Atua na e, ko e Patuiki, to fakaheke atu au kia koe; to fakamonu atu au ke he hāu a higoa tukulagi tukumuitea.
2 To fakamonu atu au kia koe ke he tau aho oti kana, to fakaheke atu foki au ke he hāu a higoa tukulagi tukumuitea.
3 Kua homo atu a Iehova, ti lata ke fakaheke fakalahi kia ia; kua nakai maeke ke kumikumi hana homo atu.
4 To fakaheke atu he taha hau mo e taha hau ke he hāu a tau gahua; to fakailoa atu e lautolu hāu a malolo.
5 To manamanatu e au ke he fulufuluola he fakahekeaga he hāu a lilifu, mo e tau kupu ke he hāu a tau mana;
6 To fevagavagahauaki a lautolu ke he tau malolo ke matakutakuina ai a koe; to tokutoku atu foki au hāu a homo atu.
7 To talahau atu e lautolu e fakamanatuaga he hāu a mahani mitaki lahi; to kalaga fiafia foki a lautolu ha ko e hāu a tututonu.
8 Kua fakaalofa noa mai a Iehova, mo e fakaalofa hofihofi noa; kua fakatuai hana ita, ti lahi ni hana fakaalofa.
9 Kua mahani mitaki mai a Iehova ke he tau mena oti, ko e hana fakaalofa hofihofi foki kua hoko ia ke he hana tau mena oti kana ne eke e ia.
10 Iehova na e, kua fakaheke atu kia koe hāu a tau mena oti ne eke; kua fakamonu atu foki kia koe hāu a tau tagata tapu.
11 Kua vagavagahau a lautolu ke he lilifu he hāu a kautu, mo e talatalahau ke he hāu a malolo;
12 Kia fakailoa atu ke he fanau he tau tagata hana tau gahua malolo, mo e lilifu he fulufuluola he hana kautu.
13 Ko e hāu a kautu ko e kautu tukulagi ia; mo e hāu a pule to hahau mo hahau ia.
14 Kua toto hake e Iehova a lautolu oti kua veveli; ko ia foki kua fakatu hako a lautolu oti kua fakatolotolo.
15 Kua hagao atu kia koe e tau mata he tau mena oti kana; kua ta age e koe ha lautolu a mena kai ke he hana ni a aho.
16 Kua fakamafola e koe hāu a lima, mo e fakamakona e manako he tau mena momoui oti.
17 Kua tututonu a Iehova ke he hana tau mahani oti; kua fakaalofa a ia ke he hana tau mena oti ne eke.
18 Kua tata mai a Iehova kia lautolu oti kana ne ui atu kia ia, ko lautolu oti ne ui kia ia mo e fakamoli.
19 Kua eke e ia e mena kua manako ki ai e lautolu kua matakutaku kia ia; to fanogonogo a ia ke he ha lautolu a kalaga atu, ti fakamoui e ia a lautolu.
20 Kua leoleo e Iehova a lautolu oti kua fakaalofa kia ia; ka e tamate e ia a lautolu oti kana kua mahani kelea.
21 To talahau atu hoku gutu e fakahekeaga a Iehova; to fakamonu atu ke he hana higoa tapu e tau tagata oti kana tukulagi tukumuitea.