Tau Salamo 148:1-14
148 HALELUIA. Kia fakaheke atu ā mutolu kia Iehova mai he lagi; kia fakaheke a mutolu kia ia ke he tau mena tokoluga.
2 Kia fakaheke atu kia ia a mutolu ko e hana tau agelu oti kana; kia fakaheke kia ia a mutolu ko e hana kau oti kana.
3 Kia fakaheke atu kia ia a mua ko e la mo e mahina; kia fakaheke atu kia ia a mutolu ko e tau fetu oti ha i ai e maama.
4 Kia fakaheke atu kia ia a mutolu ko e lagi he tau lagi, mo e vai ha i luga he tau lagi.
5 Kia fakaheke atu a lautolu ke he higoa a Iehova; ha ko ia ne vagahau, ti eke ai ni a lautolu.
6 Ne fakamau foki e ia a lautolu ke tukulagi tukumuitea; ne eke e ia e fakatufono, nakai tuai holia.
7 Kia fakaheke atu kia Iehova mai he lalolagi, ko e tau tanimo mo e tau mena hokulo oti;
8 Ko e afi mo e uha tuli, ko e kiona mo e hahau; ko e matagi afā, kua oma ke he hana kupu.
9 Ko e tau mouga mo e tau matiketike oti, ko e tau akau fua mo e tau arasi oti.
10 Ko e tau manu favale mo e tau manu huifa oti kana; ko e tau mena totolo mo e tau manu lele.
11 Ko e tau patuiki he lalolagi mo e tau motu oti kana; ko e tau iki mo e tau fakafili oti he lalolagi.
12 Ko e tau fuata katoa mo e tau tamāfine, ko e tau fuakau katoa mo e tau tama;
13 Kia fakaheke a lautolu ke he higoa a Iehova; ha ko e hana higoa hokoia kua lilifu; ko e hana fakahekeaga kua homo ia ke he lalolagi katoa mo e lagi.
14 Kua fakatokoluga foki e ia e hoe he hana motu, ko e fakahekeaga he hana tau tagata tapu oti kana, ko e fanau a Isaraela, ko e motu kua fetataki mo ia. Haleluia.