Tau Salamo 17:1-15
17 IEHOVA na e, kia fanogonogo mai a koe ke he tonu, kia haga mai hāu a na teliga ke he haku a kalaga; kia fakateliga mai ke he haku a liogi kua nakai eke mo e tau laugutu fakavai.
2 Kia hoko mai haku a fakafiliaga mai mua hāu; kia kitekite mai hāu a na fofoga ke he mahani tonu.
3 Kua kamatamata tuai e koe hoku loto; kua ahi mai e koe ke he po; kua oti he kumi mai e koe kia au, ka e nakai moua e koe ha mena; kua mau haku manatu, nakai tuai hala hoku gutu.
4 Ka ko e tau mena kua eke he tau tagata, ko e tau kupu he fofoga hāu kua taofi ai au neke fina atu au ke he tau puhala he tau tagata favale.
5 Kua mau haku a tau hui ke he hāu a tau puhala, nakai heke haku a tau hui.
6 Ko e Atua na e, kua ui atu au kia koe; ha kua fanogonogo mai a koe kia au; kia haga mai hāu a na teliga kia au, kia fanogonogo mai ke he haku a vagahau.
7 Kia fakamailoga hāu a fakaalofa, ko koe ne fakamomoui ke he hāu a lima matau a lautolu kua tua kia koe, mai ia lautolu ne tutu mai.
8 Kia leoleo e koe au tuga ne alito mata; kia fufu e koe au ke he malu he hāu a tua tapakau,
9 Mai he tau mata he tau tagata mahani kelea kua favale mai kia au; ko lautolu kua fai fi kia au, mo e agaagai mai kia au kia mate au.
10 Kua kati tuai e gako ha lautolu, kua vagavagahau fakatokoluga ke he tau gutu ha lautolu.
11 Hanai, kua agaagai mai e lautolu a mautolu ka e o fano a mautolu; kua hagao e tau mata ha lautolu ke he kelekele.
12 Tuga ne leona a ia kua mate he fia hēhē manu, mo e tuga ne punua leona a ia kua nofo ke he tau mena galo.
13 Iehova na e, kia tu mai; kia haele ā koe ki mua hana, kia liti ki lalo e koe a ia; kia laveaki e koe au ke he hāu a pelu mai ia lautolu kua mahani kelea;
14 Iehova na e, kia laveaki e koe au ke he hau a lima mai he tau tagata, ko e tau tagata he lalolagi; ha he moui nai ha lautolu a tufaaga, kua fakamakona e koe a lautolu ke he hāu a tau mena mitaki; ha ia lautolu e tau tama tane kua makona; ha lautolu a tau mena foki kua toe kua toka ia ma e tau tama ikiiki ha lautolu.
15 Ka ko au, to kitia e au hāu a fofoga ke he tututonu; ka ala au ti makona ni ke he hāu a fakatai.