Tau Salamo 25:1-22
25 IEHOVA na e, kua manako lahi haku loto kia koe.
2 Haku Atua na e, kua tua au kia koe; aua nake fakamā au, aua neke hula kia au a lautolu kua fai fi kia au.
3 Ko lautolu oti foki kua tatali kia koe, aua neke fakamā a lautolu; kia fakamā a lautolu kua eke teao ha lautolu a mahani fakavai.
4 Iehova na e, kia fakailoa mai kia au hāu a tau puhala; kia fakaako mai e koe au ke he hau a tau hala.
5 Kia takitaki e koe au ke he mena moli mai ia koe, mo e fakaako mai kia au, ha ko koe ko e Atua he haku a fakamouiaga; kua tatali au kia koe ke he aho oti.
6 Iehova na e, kia manatu e koe hāu a fakaalofa hohofi mo e hau a totonu; ha kua tali mai i tuai tigahau ia.
7 Ua manatu e koe ke he haku a tau hala ke he vaha ne fuata ai au, mo e haku a tau holifono; ka e lata mo e hau a fakalofa kia manatu mai a koe kia au, Iehova na e, ha ko e hāu a mahani mitaki.
8 Kua mahani mitaki, mo e tututonu a Iehova, ko e mena ia ke fakakite e ia e puhala ke he tau tagata hala.
9 Ti takitaki e ia a lautolu ne mahani molu ke he fakafiliaga; to fakaako foki e ia a lautolu ne mahani molu ke he hana tau puhala.
10 Ko e tau puhala oti a Iehova, ko e fakaalofa ia mo e fakamoli kia lautolu kua taofi ke he hana maveheaga mo e hana tau fakatufono.
11 Ha ko e hāu a higoa, Iehova na e, kia fakamagalo mai ai e koe haku a mahani hepehepe, ha kua lahi mahaki ia.
12 Ko hai kia e tagata kua matakutaku kia Iehova? To fakakite atu e ia kia ia e puhala kua fifili e ia.
13 To nofo a ia mo e monuina; ko e fanau hana foki to eke ma lautolu e motu.
14 Kua fakafetui a Iehova mo lautolu kua matakutaku kia ia; ti fakailoa foki kia lautolu hana maveheaga.
15 Kua hagao mau atu haku a tau mata kia Iehova; ha ko ia ni kua āki haku tau hui mai he kupega.
16 Kia hagao mai a koe kia au, mo e fakaalofa mai kia au; ha kua tokotaha ni au mo e matematekelea.
17 Kua fakalahi e matematekelea he haku loto; kia uta kehe e koe au mai he tau mena ne mamahi ai.
18 Kia kitekite mai a koe ke he haku a matematekelea mo e haku a mamahi; kia fakamagalo foki e koe haku a tau hala oti kana.
19 Kia kitekite a koe kia lautolu kua fai fi kia au, ha kua tokologa a lautolu; kua vihia foki e lautolu au mo e vihia ke mamahi ai.
20 Kia leveki mai e koe au, mo e laveaki mai kia au; aua neke mā au, ha kua tua tuai au kia koe.
21 To leveki na au he mahani hako mo e tututonu; ha kua tatali au kia koe.
22 Ko e Atua na e, kia laveaki e koe a Isaraela mai he hana tau matematekelea oti kana.