Tau Salamo 27:1-14
27 KO Iehova ko e haku a maama ia, mo e haku a fakamouiaga; to matakutaku au kia hai? Ko Iehova ko e taue ia ke moui ai au; to matakutaku au kia hai?
2 Ne unuunu mai kia au ke tau e tau tagata mahani kelea, kia kai hoku tino, ko lautolu ne favale mai mo lautolu ne fai fi kia au; ti tupetupe ai a lautolu mo e veveli a lautolu.
3 Pete ni kua fakatu e heaga api he kau ke tau kia au, ka e nakai matakutaku hoku loto; pete ni kua hoko mai kia au e tau, to faka manavalahi ai au.
4 Taha mena ne ole au mai ia Iehova, ko e mena ia ni ke kumi atu e au ki ai; kia nofo au ke he fale a Iehova ke he tau aho oti he haku a moui, kia kitia ai e au e fulufuluola a Iehova, mo e kumikumi ke he hana faituga.
5 Ha ko e mena fufu e ia au ke he hana fale api ke he aho kelea; to fufu e ia au ke he mena galo he hana fale uta fano; to ta hake e ia au ki luga he maka tumau.
6 Hanai, to fakatokoluga haku ulu ki luga ia lautolu kua fai fi kia au, ko lautolu ne agaagai mai kia au; to ekepoa foki au ke he tau poa tamate ke he hana fale uta fano mo e kalaga fiafia; to uhu lologo au mo e fakaheke atu kia Iehova.
7 Iehova na e, kia fofoga mai ke he haku a leo ka ui atu au; kia fakaalofa mai a koe, mo e fanogonogo mai kia au.
8 Ne tala atu haku loto kia koe, he pehe mai a koe, Kia kumi mai a mutolu kia au; Iehova na e, to kumi atu e au kia koe.
9 Aua neke ufiufi hāu a fofoga ia au; aua neke tutuli kehe e koe hāu a fekafekau ke he hāu a ita: ne eke a koe mo lagomatai haku; aua neke toka noa e koe au, aua foki neke tiaki e koe au, ko e Atua he haku a fakamouiaga.
10 Ha kua tiaki au he haku a matua tane mo e haku a matua fifine, ti talia ai e Iehova au.
11 Iehova na e, kia fakaako mai e koe au ke he hau a puhala, ti takitaki e koe au ke he puhala molemole, ha ko lautolu kua favale mai kia au.
12 Aua neke tuku atu e koe au ke he manako ha lautolu ne favale mai kia au; ha kua tutu mai e tau talahau ke fatipiko kia au, mo lautolu kua fafagu mai mo e favale.
13 Aua e tua au ke kitia e mahani mitaki a Iehova ke he motu he tau tagata momoui, po kua mate tuai au.
14 Kia tatali atu a kia Iehova, kia fakamalolo, to fakamalolo foki e ia hau a loto; kia tatali atu ni kia Iehova.