Tau Salamo 28:1-9
28 IEHOVA na e, haku a maka tumau, kua ui atu au kia koe; aua neke fanogonogo tuli a koe kia au, neke fakamate a koe kia au, ti fakatatai au mo lautolu kua hifo kehe luo.
2 Kia fanogonogo mai a koe ke he leo he haku a ole atu, ka kalaga au kia koe, ka nikiti haku tau lima ke he mena tapu kua vagahau mai ai.
3 Aua neke futia au fakalataha mo e tau tagata mahani kelea, mo lautolu kua eke mena kelea; ko lautolu ne vagahau fakamitaki mo e tau tagata kua katofia mo lautolu, ka e ha ha he tau loto ha lautolu e kelea.
4 Kia ta atu e koe kia lautolu ke lata mo e ha lautolu a mahani, ke lata foki mo e kelea kua eke e lautolu; kia ta atu e koe kia lautolu ke lata mo e tau gahua he tau lima ha lautolu; kia taui atu kia lautolu e tau mena ne eke e lautolu.
5 Ha kua nakai manamanatu a lautolu ke he tau mena ne eke e Iehova, mo e tau gahua he hana tau lima; to ulu ki lalo e ia a lautolu, mo e nakai ati hake a lautolu.
6 Kia fakaaue kia Iehova ha kua fanogonogo mai a ia ke he leo he haku a tau ole.
7 Ko Iehova, ko e haku a malolo ia, mo e haku a akau punuti; ne tua haku a loto kia ia, ti moua ai e au e lagomatai, ko ia ne fiafia ai hoku loto, ko ia foki ne fakaheke au ki ai ke he haku a lologo.
8 Ko Iehova, ko e malolo ia ha lautolu, ki ia foki ko e taue ke moui ai a ia ne fakauku e ia.
9 Kia fakamoui e koe hāu a motu, mo e fakamonuina hāu a fonua; kia fagai e koe a lautolu, mo e fakatokoluga e koe a lautolu tukulagi.