Tau Salamo 35:1-28
35 IEHOVA na e, kia totoko kia lautolu kua totoko mai kia au, kia tau mo lautolu kua tau mai kia au,
2 Kia toto a e akau punuti mo e akau pāpā, mo e tu mai a koe ke lagomatai kia au.
3 Kia toto a e tao, mo e puipui e hala ha lautolu ne tutuli mai au; kia pehe mai ke he haku a agaga, Ko au ni ko e fakamoui hāu.
4 Kia fakamā mo e fakahakuhaku a lautolu kua kumi au ke keli; kia liliu ki tua mo e mā a lautolu kua pulega ke kelea ai au.
5 Kia eke a lautolu ke tuga e tau otaota he tau saito kua havilia he matagi; kua palu hifo a lautolu he agelu a Iehova.
6 Kia pouli mo e momole ha lautolu a puhala; kia tutuli foki a lautolu he agelu a Iehova.
7 Ha kua fufu teao e lautolu ha lautolu a kupega kia to ai au ke he luo, ne keli luo teao e lautolu ke moua ai au.
8 Kia hoko kia ia e malaia kua nakai iloa e ia; kia puto foki a ia ke he hana kupega ne fufu a ia; kia to foki a ia ke he malaia ia ni.
9 To fiafia ai hoku loto kia Iehova; to olioli foki ke he hana fakamouiaga.
10 To pehe haku a tau huimotua oti kana, Iehova na e, ko hai kia taha kua tatai mo koe, ko koe kua laveaki e tagata matematekelea mai ia ia ne mua hana malolo; kua laveaki foki e tagata matematekelea mo e nofogati mai ia ia kua fofo hana tau mena?
11 Kua tutu mai kia au e tau talahau favale, kua hūhu mai kia au ke he tau mena nakai iloa e au.
12 Kua taui mai e lautolu haku a mitaki ke he kelea, ke nofogati ai haku agaga.
13 Ka ko au nai, ne tapulu au ke he ie talatala ha kua mamahi a lautolu; ne fakamamahi e au a au ke he fakakanopogi; ne liuaki mai foki haku a liogi ke he haku fatafata.
14 Ne fai fano au tuga ne haku a kapitiga a ia po ke matakainaga haku; ne tukutukuhifo au mo e pilo tuga ne taha kua mānu ke he hana matua fifine.
15 Ka kua fiafia a lautolu ha kua fakatetō au: kua fakapotopoto foki a lautolu; kua fakapotopoto mai e tau tagata fakalialia ke fakamamahi au, ka e nakai iloa e au ; ne hēhē e lautolu au mo e nakai fakamate.
16 Kua konoi ha lautolu a tau nifo kia au fakalataha mo e tau tagata hepehepe, ko lautolu kua va ke moua ai e taha areto.
17 Ko e Iki na e, to kitekite e koe ki ai ato a fe? kia liuaki haku agaga mai he tau lagatau malaia ha lautolu, kia laveaki au ne tokotaha mai he tau leona.
18 To fakaheke atu au kia koe ke he fakapotopotoaga lahi, mo e lologo atu kia koe ki mua he motu ne tokologa.
19 Aua neke hula a lautolu kia au, ko lautolu kua ita teao mai kia au; aua neke kemokemo e tau mata ha lautolu kua fakavihia teao mai kia au.
20 Ha kua nakai vagahau mafola a lautolu, ka kua manamanatu e lautolu e tau kupu pikopiko kia lautolu kua nonofo fakatekiteki ke he motu.
21 Kua fakamaga ha lautolu a tau gutu kia au, mo e pehe mai, Aha! aha! kua kitekite ki ai ha tautolu a tau mata.
22 Iehova na e, kua fioia e koe; ua fakamate a koe: ko e Iki na e, aua neke fakamamao a koe ia au.
23 Haku Atua na e, haku Iki na e, kia ala a, kia tu mai a ke he haku a fakafiliaga, mo e haku a taufetoko.
24 Iehova na e, haku Atua, kia fakafili mai e koe au ke lata mo e hāu a tututonu; aua neke hula a lautolu kia au.
25 Aua neke pehe hifo a lautolu ke he tau loto ha lautolu, Aha! ha tautolu a manako haia; aua neke pehe a lautolu, Kua folo tuai e tautolu a ia.
26 Kia mā mo e fakahakuhaku fakalataha a lautolu kua fiafia ke he haku a mamahi; kia fakatapulu a lautolu ke he mā mo e fiua, ko lautolu kua fakaikaluga kia au.
27 Kia lologo mo e kolikoli a lautolu kua loto ke he haku a tututonu; kia talahau mau e lautolu, Kia fakaheke kia Iehova, ko ia kua finagalo ke monuina hana fekafekau,
28 To tokutoku atu foki haku alelo hāu a tututonu, mo e fakaheke atu kia koe ke he aho oti.