Tau Salamo 38:1-22
38 IEHOVA na e, aua neke akonaki au ke he hau a ita; aua foki neke fahi au ke he hāu a ita lahi.
2 Ha kua komo hau a tau fana ki loto ia au, kua mamafa foki hau a lima ki luga ia au.
3 Nakai ha ia au ha maga kakano malolo ha ko e hāu a ita; nakai ha he tau huimotua haku e mafola ha ko e haku a tau hala.
4 Ha kua hoko ni haku a tau hala ki luga hoku ulu; ne tuga e kavega mamafa, kua pehia ai au.
5 Kua elo haku a tau motu; kua pela kelea ni ha ko e haku a goagoa.
6 Kua fitikeleu au; kua fakatolotolo lahi na au; kua faifano au mo e pilo ke he aho oti.
7 Kua mamahi haku tokupu ke he kafo vevela; nakai fai maga kakano malolo au.
8 Kua lolelole lahi na au, kua malipilipi lahi ni au; kua fakatutū au ha ko e oi he haku a loto.
9 Ko e Iki na e, ha ha i mua hāu haku a tau manako oti; kua nakai galo foki ia koe haku a tau oi.
10 Kua hohopo haku a atefua, kua mole atu haku a malolo; ko e maama foki he haku tau mata nakai ha ia au ia.
11 Kua tutu fakamamao atu mo e haku a malaia e tau fakahele haku mo e haku a tau kapitiga; kua tutu fakamamao atu foki a lautolu ne katofia mo au.
12 Kua taute hele e lautolu kua kumikumi ke kelipopo au; ko lautolu foki kua kumi ke kelea ai au kua vagavagahau a lautolu ke he tau mena kelea, mo e manamanatu ke he tau mena fakavai ke he aho oti.
13 Ka ko au nai tuga ne tagata teliga tuli au nakai logona; po ke tagata kuhukuhu kua nakai mavete hana gutu.
14 Ko au foki tuga ne tagata kua nakai logona, ti nakai ha he gutu hana ha kupu ke totoko atu.
15 Ha ko koe Iehova na e, kua amaamanaki au kia koe; ko koe ni ma Iki na e, ko e haku a Atua, ke tali mai ai.
16 Ha kua pehe au, neke hula a lautolu kia au; ti fakatokoluga a lautolu kia au ka heke haku a hui.
17 Ha ko au, kua teitei fakatetō au; ha i mua ia au haku a mamahi mau.
18 Ha ko e mena talahau atu e au haku a mahani kelea; kua fakaatukehe au ha ko e haku a tau hala.
19 Ka ko e tau tagata momoui a lautolu kua fai fi kia au, kua malolo a lautolu; kua fakatokologa a lautolu kua fakavihia teao mai kia au.
20 Ko lautolu foki kua taui e mitaki ke he kelea, kua eke e lautolu au mo fi ha lautolu, ha kua tutuli e au e tau mena mitaki.
21 Iehova na e, aua neke tiaki e koe au; hoku Atua na e, aua neke fakamamao ia au.
22 Ko e Iki na e, haku a fakamouiaga, kia fakaave mai ke lagomatai kia au.