Tau Salamo 4:1-8
4 KO e Atua na e, ko koe kua tututonu ai au, kia fofoga mai a koe ke he haku a ui atu; kua laveaki e koe au mai he matematekelea; kia fakaalofa mai kia au, mo e fanogonogo mai ke he haku a liogi.
2 Ko mutolu ko e fanau he tau tagata, to eke e mutolu haku a lilifu mo mena ke ma ai ato a fe? To loto kia a mutolu ke he mena fakateaga ato a fe? To kumi kia e mutolu ke he pikopiko ato a fe? Sila.
3 Kia iloa e mutolu kua vevehe kehe e Iehova māna e tagata tapu; to fanogonogo mai a Iehova ke he haku a ui atu kia ia.
4 Kia vivivivi a mutolu, aua foki neke hala; kia manamanatu hifo ke he tau loto ha mutolu ke he tau moheaga ha mutolu, kia fakamamate foki a mutolu. Sila.
5 Kia eke poa a mutolu ke he tau poa lata, kia falanaki foki a mutolu kia Iehova.
6 Ne tokologa kua pehe mai, To fakakite e hai ha mena mitaki kia mautolu? Iehova na e, kia hagao mai kia mautolu e maama he hāu a fofoga.
7 Kua lahi e fiafia kua tuku mai e koe ke he hoku loto, ka e tote ha lautolu ke he vaha ne fakaloga ai ha lautolu a tau saito, mo e ha lautolu a uaina.
8 To takoto au, ti mohe foki au mo e mafola; ha ko koe, Iehova na e, hoko koe ni kua nofo ai au mo e nakai haofia.