Tau Salamo 40:1-17
40 NE tatali ni au kia Iehova; ti haga mai ni a ia kia au, ne fanogonogo mai foki a ia ke he haku a kalaga.
2 Ne ta hake e ia au mai he luo he malaia, mo e mena pelapela ue atu; ne fakatu foki e ia haku tau hui ki luga he maka tumau, ti fakamau ai e ia haku a fanoaga.
3 Kua tuku mai e ia e lologo fou ke he haku a gutu, ko e fakahekeaga ke he Atua ha tautolu; to kitia ai he tokologa, ke matakutaku foki a lautolu, mo e tua a lautolu kia Iehova.
4 Uhoaki e tagata kua tua kia Iehova, ka e nakai haga atu ke he tau tagata fakatokoluga, mo lautolu kua mafoki age ke he tau mena pikopiko.
5 Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe; kua fia fakailoa atu e au mo e vagahau ki ai, ka e loga ni, ai maeke he totou.
6 Kua nakai finagalo a koe ke he poa tamate mo e poa ke he tau mena kai, kua fakapu e koe haku tau teliga; ko e tau poa huhunu mo e tau poa ha ko e tau hala, kua nakai ole mai ai e koe.
7 Ti pehe atu ai au, Kitiala, kua fina atu au; kua tohia kia au ke he tohivakai;
8 Haku Atua na e, kua fiafia au ke eke hāu a finagalo; ha i loto ia au hau a fakatufono.
9 Kua fakamatala e au e tututonu ke he fakapotopotoaga lahi; kitiala, kua nakai taofi e au haku tau laugutu, Iehova na e, kua fioia ni e koe.
10 Kua nakai fufu e au hāu a tututonu ke he haku a loto; kua talahau atu e au hau a fakamoli mo e hau a fakamouiaga; nakai fufu e au hāu a fakaalofa, mo e hāu a tonu ke he fakapotopotoaga lahi.
11 Iehova na e, nakai taofi e koe hāu a fakaalofa hohofi kia au; kia leveki mau ai au he hāu a fakaalofa mo e hāu a fakamoli.
12 Ha kua agaagai au he tau mena kelea kua nakai maeke he totou; kua moua au he haku a tau hala, kua nakai maeke ai au ke kitekite; kua loga, ka e gahoa haku a tau lauulu, kua oti haku a manava.
13 Iehova na e, kia finagalo a koe ke laveaki au; Iehova na e, kia fakaave ke lagomatai mai kia au.
14 Kia mā, mo e fakahakuhaku fakalataha a lautolu kua fia kelipopo au; kia liliu ki tua mo e fakama a lautolu kua manako ke kelea ai au.
15 Kia fakahakuhaku ha kua mā a lautolu, ko lautolu ne pehe mai kia au, Aha! aha!
16 Kia olioli mo e fiafia kia koe a lautolu oti kua kumi kia koe; kia pehe mau a lautolu kua fiafia ke he hāu a fakamouiaga, Kia fakaheke kia Iehova.
17 Ka ko au nai, kua matematekelea mo e nofogati au; to manatu mai e Iki kia au; ko koe ni ko e haku a lagomatai mo e haku a fakamoui; haku Atua na e, aua neke mule mai a koe.