Tau Salamo 41:1-13
41 UHOAKI e tagata kua manatu ke he tagata nofogati; to fakahao e Iehova a ia ke he aho kelea.
2 To leveki e Iehova a ia mo e fakamoui; to monuina foki a ia ke he motu; ti ua tuku atu e koe a ia ke he manako ha lautolu kua fai fi kia ia.
3 To faihoani a Iehova kia ia ka takoto a ia he hana gagao; kua fuluhi e koe hana mohega oti kana ke he hana gagao.
4 Ne pehe atu au, Iehova na e, kia fakaalofa mai a koe kia au; kia fakamalolo e koe haku agaga; ha kua hala tuai au kia koe.
5 Ko lautolu kua fai fi kia au kua vagahau e lautolu ke he mena ke kelea ai au, kua pehe age, To mate a fe a ia, mo e galo hana higoa?
6 Kaeke foki ke hau a ia ke ahi mai kia au, ti vagahau pikopiko ai a ia, kua fakapuke e ia hana loto ke he tau mena kelea māna; ti fano a ia ki fafo mo e vagahau ki ai.
7 Kua fefanafanaki fakalataha a lautolu oti kana kua fakavihia mai kia au ke he tau mena kua hoko kia au, mo e pulega a lautolu ke kelea ai au.
8 Kua pehe a lautolu, Kua hoko tuai kia ia e mena kelea lahi; ko ia ne takoto mai, nakai tuai tu ki luga a ia.
9 Ko e tagata foki ko e kapitiga haku, ko ia ne tua au ki ai, ne kai haku tau mena kai, kua aka mai a ia hana muihui kia au.
10 Ka ko koe Iehova na e, kia fakaalofa mai kia au, mo e fakatu mai au, ti taui atu e au a lautolu.
11 Ko e mena ia kua iloa ai e au kua finagalo fiafia mai a koe kia au, ha kua nakai hula kia au e tagata kua fai fi kia au.
12 Ha ko au, kua toto hake e koe au ke he haku a mahani hakohako; ti fakatu foki e koe au ki mua hau tukulagi.
13 Kia fakamonu kia Iehova, ko e Atua a Isaraela, mai i tuai tigahau to hoko ke he tukulagi, Amene mo Amene.