Tau Salamo 42:1-11
42 KO e Atua na e, tuga ne aila kua manako lahi ke he tau vai lele, kua manako lahi pihia haku agaga kia koe.
2 Kua fia inu haku agaga ke he Atua, ko e Atua moui; to fina atu a fe au kia kitia ai au ki mua he Atua?
3 Kua eke haku a tau hihinamata mo mena kou kai ke he aho mo e po, ka kua pehe mai a lautolu ke he aho oti, Ko fe kia hāu a Atua?
4 To manamanatu e au e tau mena ia, ti fakalolelole foki hakua a manava ki loto ia au; ha ko e mena ne o a mautolu fakalataha mo e tau tagata tokologa, mo e o fakatekiteki a mautolu ke he fale he Atua, mo e leo fiafia mo e fakaheke, ko e tokologa ko lautolu kua eke galue.
5 Haku agaga na e, ko e heigoa e mena kua mānu ai, mo e fakaatukehe ai a koe ki loto ia au? kia amaamanaki a koe ke he Atua, ha ko e mena to liu foki fakaheke au kia ia ha ko e fakamouiaga mai mua hana.
6 Haku Atua na e, kua mānu haku agaga ki loto ia au; ko e mena ia ne manamanatu ai au kia koe he he motu a Ioritana, mo e atu Heremoni, mo e mouga ko Misara.
7 Kua feheaaki e taha moana mo e taha moana ha ko e leo he hāu a hiohio tahi; kua tanumia au he hāu a tau peau mo e hāu a tau peau fafati oti kana;
8 To fekau mai e Iehova hana fakaalofa ka aho, ha ia au foki ke lologo kia ia ka po, ko e liogi ke he Atua he haku a moui.
9 To pehe atu au ke he Atua, ko e haku a maka tumau, Ko e ha kia ne fakanimonimo ai e koe au? ko e ha kia ne faifano ai au mo e pilo ha ko e favale hana kua fai fi mai.
10 Kua malipilipi haku a tau huimotua he eke fakakelea mai e lautolu kua fai fi kia au, he pehe mai ke he aho oti, Ko fe kia hāu a Atua?
11 Haku agaga na e, ko heigoa e mena kua mānu ai a koe? ko e ha foki kua fakaatukehe ai a koe ki loto ia au? kia amaamanaki a koe ke he Atua; ha ko e mena to liu foki fakaheke au kia ia, ko e haku a fakamouiaga ia mo e haku Atua.