Tau Salamo 48:1-14
48 KUA homo a Iehova, kua lata foki ke fakaheke fakalahi kia ia ke he maga ha Atua ha tautolu, ko e hana mouga tapu.
2 Kua fulufuluola e tokoluga he mouga ko Siona, kua fiafia ai e lalolagi oti kana; ko e fahi tokelau, ko e maga he Patuiki to atu.
3 Kua iloa ni e Atua ke he hana tau fale iki, ke eke mo kolo tokoluga ni a ia.
4 Ha ko e mena, kitiala, kua fakapotopoto mai e tau patuiki; kua mole atu fakalataha a lautolu.
5 Ne kitekite mai a lautolu, ti ofomate ai; ne vivivivi a lautolu, ti kua fehola fakatepetepe a lautolu.
6 Ne moua a lautolu he vivivivi ke he mena ia ni, ko e mamahi tuga ne fifine fanau.
7 Kua lipilipi e koe e tau foulua Tasisa ke he matagi uta.
8 Tuga ne fanogonogo atu a tautolu, pihia ni ha tautolu a kitekite atu ke he maga a Iehova Sapaota, ko e maga he Atua ha tautolu; to fakatumau tukulagi a ia he Atua. Sila.
9 Ko e Atua na e, kua manamanatu e mautolu hāu a fakaalofa ki loto he hāu a faituga.
10 Ko e Atua na e, tuga ne hau a higoa pihia ni hau a fakahekeaga kua hoko ke he gataaga he lalolagi; kua puke hāu a lima matau ke he hāu a tututonu.
11 To fiafia e mouga ko Siona, to olioli e tau tamafine a Iuta, ha ko e hāu a tau fakafiliaga.
12 Kia takai ā a Siona, mo e evaeva takai kia ia, kia totou la hana tau kolo.
13 Kia manamanatu fakatonu ke he hana pa, mo e manatu fakatonu hana tau fale iki; kia fakamatala atu ai e mautolu ke he hau i tua.
14 Ha ko e Atua nai, ko e ha tautolu a Atua ia tukulagi tukumuitea; ko ia ni ke takitaki a tautolu ato hoko ke he mate.