Tau Salamo 49:1-20
49 KIA fanogonogo mai ke he mena nai ko mutolu, ko e tau motu oti kana, kia fakateliga mai a mutolu oti kua nonofo ke he lalolagi;
2 Ko e tau lalo tagata katoa mo e tau iki; ko e tau maukoloa fakalataha mo e tau nonofogati.
3 To vagahau haku gutu ke he pulotu; to iloilo foki e manamanatu he haku loto.
4 To haga atu haku teliga ke he kupu fa katai, to fakakite ke he kitara haku a kupu galo.
5 Ko e heigoa e mena ke matakutaku ai au ke he tau aho kelea, ka agaagai au he hala ha lautolu kua takahao kia au?
6 Ko lautolu kua tua ke he koloa ha lautolu, mo e kolikoli ha ko e tau mena loga ha lautolu;
7 Nakai fakai ke maeke ia taha ia lautolu ke fakafua e matakainaga hana, po ke ta atu ke he Atua e palepale māna,
8 (Ha ko e mena uka lahi ni e palepale he tau agaga ha lautolu; ti nakai maeke ni tukulagi;)
9 Kia moui tukulagi a ia; kia nakai kitia e ia e tukuaga.
10 Ha kua kitia e ia mena mamate e tau tagata iloilo, pihia foki e tagata goagoa, mo e tagata kolokolovao to mamate ni a lautolu; ti toka ai ha lautolu a koloa ma e fala tagata.
11 Ko e taofi ha lautolu to tumau fakaoti a lautolu a tau fale, mo e tau mena kua nonofo ai ato hahau mo hahau; kua fakahigoa foki e lautolu ha lautolu a tau fonua ke he tau higoa ha lautolu.
12 Ka e nakai tumau he tagata ke he hana mitaki; kua tuga ne tau manu a ia, to mamate a lautolu.
13 Ko e ha lautolu a puhala hanai, ko e ha lautolu a goagoa ia; ka e fiafia ni a lautolu kua mumui kia lautolu ke he ha lautolu a tau kupu. Sila.
14 Kua tuku atu a lautolu ke he tukuaga tuga ne fuifui mamoe; kua fagai a lautolu he mate; to pule e tau tagata tututonu kia lautolu ke he magaaho pogipogi; to mole atu foki ha lautolu a fulufuluola ke he tukuaga mai he tau mena ne nonofo ai a lautolu.
15 Ka e fakamoui ni he Atua haku agaga mai he pule he tukuaga ha ko e mena to uta ai e ia au. Sila.
16 Aua neke matakutaku a koe ka maukoloa ai e taha tagata, ka fakalahi foki e lilifu he hana faoa;
17 Ha kua nakai uta e ia ha mena ka mate a ia; nakai mui hifo kia ia e lilifu hana.
18 Ha kua fakamonuina e ia a ia ni he moui a ia; ti fakaheke foki e falu kia koe ka mahani mitaki a koe kia koe ni.
19 To fano ni a ia ke he hau he hana tau matua; nakai kitia e lautolu e maama tukulagi ni.
20 Ko e tau tagata ha i ai e lilifu, ka e nakai manamanatu, tuga ne tau manu tamate a lautolu.