Tau Salamo 50:1-23
50 KO e Atua he tau atau, ko Iehova, kua vagahau mai a ia, mo e ui a ia ke he lalolagi mai he mena ne hake ai e la, kua hoko ke he hana hifoaga.
2 Kua kikila mai e Atua i Siona, ko e mena haia ne mua ue atu e fulufuluola.
3 To haele mai e Atua ha tautolu, mo e nakai fakamate a ia; to kai he afi ki mua hana, mo e agaagai a ia he afa lahi mahaki.
4 Kua ui a ia ke he lagi i luga, katoa foki mo e lalolagi, ke he fakafiliaga he hana motu.
5 Kia fakapotopoto mai kia au haku tau tagata tapu, ko lautolu ne eke e maveheaga mo au ke he poa.
6 To talahaua foki he lagi hana tututonu; ha ko e Atua ko ia ni ko e fakafili. Sila.
7 Kia fanogonogo mai haku motu na e, toka au ke talahau atu, Isaraela na e, toka au ke tala atu fakatonu foki kia koe, ko au ni ko e Atua, ko e hāu a Atua ni.
8 Nakai ko e tau poa hāu ke akonaki atu ai e au a koe, po ke hāu a tau poa huhunu ha i ai i mua haku nakai noa.
9 Nakai uta e au ha povi tane mai he fale hāu, po ke tau koti tane mai he hāu a loto pa.
10 Ha ko e mena ha ha ia au e tau manu oti he vao motua, ko e tau manu kua totolo ke he tau mouga ko e afe ni.
11 Kua iloa e au e tau manu lele oti ha he atu mouga; ko e tau manu he vao foki, ha ha ia au ia.
12 Ane fia kai au po kua nakai tala atu e au kia koe; ha ko e mena ha ia au e lalolagi mo e tau mena kua fakapuke ai.
13 To kai kia e au e kakano he tau povi tane, po ke inu e tau toto he tau koti tane?
14 Kia eke la e fakahekeaga mo poa ke he Atua; kia ta atu kia ia ne Mua ue atu e tau mena ne omonuo ai e koe.
15 Kia ui mai foki e koe kia au ke he aho matematekelea; ti laveaki au a koe, to fakaheke mai a koe kia au. Ka ko e tagata mahani kelea kua tala age e Atua kia ia,
16 Ko e ha kia kua talahau ai e koe haku a tau fakatufono, mo e tokutoku haku a maveheaga he gutu hāu?
17 Ko koe foki, kua vihiatia e koe e akonakiaga, mo e tiaki haku tau kupu ki tua hāu.
18 Ka kitia e koe e kaiha, ti loto fakalataha ai a koe mo ia; kua fefonua foki a koe fakalataha mo e tau faivao.
19 Kua fakahopo mai e koe e tau kupu kelea he hāu a gutu, kua fati hāu a alelo e tau kupu fakavai.
20 Kua nofo a koe ti kupu kelea a koe ke he hāu a matakainaga; kua eke fakakelea a koe ke he tama he hāu a matua fifine.
21 Kua eke e koe e tau mena ia, ka e fakamate na au; piko a koe ko e mena tatai a taua mo koe; to akonaki e au a koe, mo e laulau e tau mena ia ki mua hāu.
22 Ati manamanatu ā ke he mena nai, ko mutolu ne fakanimonimo e Atua, neke hēhē e au a mutolu, ka e nakai fai laveaki.
23 Ko ia kua eke e fakahekeaga mo poa, kua fakalilifu e ia au; ko ia foki kua taute hana mahani, to fakakite e au kia ia e fakamouiaga he Atua.