Tau Salamo 56:1-13
56 KO e Atua na e, fakaalofa mai kia au; ha kua faguhē mai e tau gutu he tau tagata kia au; ko ia ne tau kia au kua favale mai a ia kia au ke he aho oti.
2 Kua faguhē mau mai kia au ke he aho oti e tau gutu ha lautolu ne fai fi kia au; ha kua tokologa a lautolu ne tau mai kia au mo e fakatokoluga mai.
3 Ko e aho kua matakutaku ai au, ti tua ai au kia koe.
4 Kua fiafia au ke he Atua ha ko e hana kupu; kua tua au ke he Atua; nakai matakutaku au ke he taha mena ka eke he tau tagata kia au.
5 Kua liliu kehe e lautolu haku a tau kupu ke he tau aho oti kana; kua eke ha lautolu a tau manamanatu oti ke kelea ai au.
6 Kua fakapotopoto a lautolu, kua fakamumuli a lautolu kua kitekite a lautolu ke he haku a tau tuagahui; ha kua amaamanaki a lautolu ke mate au.
7 To hao kia a lautolu ha kua mahani kelea? Ko e Atua na e, kia palu hifo e koe e tau motu ke he hāu a ita.
8 Kua totou ni e koe haku a tau fehola fano; kia utu haku a tau hihina mata ke he hāu a lupo; nakai kia ha ha he tohi hāu?
9 Ko e aho ka ui atu au kia koe, ke liliu ai ki tua a lautolu ne fai fi kia au; kua iloa e au e mena nai ha ha ia au e Atua.
10 To fakaheke atu au ke he Atua ha ko e hana kupu; to fakaheke atu au kia Iehova ha ko e hana kupu.
11 Kua tua au ke he Atua; nakai matakutaku au ke he taha mena ka eke he tau tagata kia au.
12 Ko e Atua na e, ha ha ia au ke ta atu kia koe e tau mena ne omonuo ai au; to ta atu e au e tau poa fakaaue kia koe.
13 Ha kua laveaki e koe au mai he mate; nakai kia fakamalolo e koe haku tau hui neke tulei au, kia faifano au ki mua he Atua ke he maama he moui.