Tau Salamo 63:1-11
63 KO e Atua na e, ko e haku a Atua a koe; to uhu kumi e au a koe; kua fia inu haku agaga kia koe, kua mate au he manako lahi kia koe ke he motu nakai fai vai, kua mategugu ai ka e nakai fai vai.
2 Kia kitia e au hāu a malolo, mo e hāu a lilifu, tuga ne kitia e au a koe ke he faituga.
3 Ha kua mua e mitaki he hāu a fakaalofa ke he moui; to fakaheke atu au kia koe ke he haku a tau laugutu.
4 Ko e mena ia ke fakaaue atu ai au kia koe ka kua moui au; to nikiti hake e au haku a tau lima ke he hāu a higoa.
5 Tuga ne mena gako mo e lolo ke makona ai au; ko e tau laugutu fiafia foki ke fakaheke atu ai haku gutu kia koe.
6 Ka manatu e au kia koe ke he moheaga haku, ti manamanatu ai au kia koe ke he tau leoleoaga he po.
7 Ha kua eke a koe mo lagomatai kia au; kua fiafia foki au ke he malu he hāu a tau tapakau.
8 Kua pipiki ni haku loto kia koe; kua taofi au he hāu a lima matau.
9 Ka ko lautolu kua kumi ke kelipopo au kia matepopo au, to o hifo a lautolu ke he mena hokulo he kelekele.
10 To tuku atu a lautolu ke he pule he pelu; to uta a lautolu mo tufaaga he tau alope.
11 Ka ko e patuiki, to fiafia a ia ke he Atua; to kolikoli takitokotaha a lautolu oti ne omonuo kia ia; ha ko e mena ponotia e tau gutu ha lautolu ne vagahau pikopiko.