Tau Salamo 64:1-10
64 KO e Atua na e, kia fanogonogo mai a koe ke he haku a liogi; kia leveki e koe haku a moui neke matakutaku au kia ia ne fai fi mai.
2 Kia fufu e koe au mai he pulega he tau tagata mahani kelea, mo e miha he tau tagata kua mahani hepehepe.
3 Kua fakamata e lautolu ha lalu tau alelo tuga ne pelu; kua loloku e lautolu e kaufana ke fana mai ha lautolu a tau fana, ko e tau kupu fakahogohogo haia
4 Kia fana e lautolu mai he tau mena galo ke he tau tagata mahani hakohako; ti fana fakalutukia a lautolu kia ia, ti nakai matakutaku a lautolu.
5 Kua fetomāki a lautolu ke fakamalolo ke he mena kelea; kua vagavagahau a lautolu ke fufu e tau matahele; kua pehe a lautolu, To kitia e hai a tautolu?
6 Kua kumikumi e lautolu e mena kelea; kua pehe a lautolu, Kua oti he kumi fakamakutu e tautolu; ko e manamanatu hifo mo e loto ha lautolu takitokotaha kua hokulo ia.
7 Ka kua fana fakalutukia he Atua a lautolu ke he fana; ti kafokia ni a lautolu.
8 Kua tauveli a lautolu, kua hoko kia lautolu e kupu he tau alelo ha lautolu; to fehola kehe a lautolu oti kua kitekite kia lautolu.
9 Ti matakutaku e tau tagata oti, mo e talahau e lautolu e mena ne eke he Atua; ti manamanatu foki e lautolu hana gahua.
10 To fiafia e tagata tututonu kia Iehova, mo e tua kia ia; ti kolikoli ai a lautolu oti kua loto hako.