Tau Salamo 65:1-13
65 KO e Atua na e, kua tatali kia koe e fakahekeaga i Siona; to ta atu ni kia koe e mena ne omonuo ai.
2 Ko e fanogonogo liogi na e, to o atu kia koe e tau tagata oti kana.
3 Kua kautu kia au e tau kupu hepehepe; ko e tau holifono ha mautolu to lukutoto e koe.
4 Uhoaki e tagata ne fifili e koe, mo e tuku e koe ke fakatata atu kia koe, to nofo a ia ke he hāu a lotopā; to makona a mautolu he tau mena mitaki ha he fale hāu, ko e hāu a faituga tapu.
5 Ko e Atua na e ha mautolu a fakamouiaga, kua tali mai a koe kia mautolu mo e tonu ke he tau mena matakutakuina; ko koe kua tua ki ai e tau fakahikuaga oti he lalolagi, katoa mo lautolu kua mamao atu ki vaha.
6 Kua fakatumau ni e tau mouga he hana malolo; kua pipi a ia ke he malolo;
7 Ko ia ne fakamate ai e tahi gu, ko e go foki he hana tau peau, mo e miha he tau motu.
8 Kua matakutaku foki ke he hāu a tau fakamailoga a lautolu ne nonofo ke he tau mena mamao, ko e tau mena ne kamata ai e pogipogi ti hoko ni ke he afiafi kua fakafiafia ai e koe.
9 Kua ahiahi e koe e kelekele mo e fuifui ai e koe; kua fakamonuina fakalahi ai e koe; ko e vailele he Atua kua puke ia ke he vai; kua taute e koe ha lautolu a saito he kua taute pihia a koe ki ai.
10 Kua fakapuke e koe hana tau fakatapuke, kua fakato hifo e uha ke he hana tau ava; kua fakamalū ai e koe ke he tau uha; kua fakatupuolamoui e koe hana tau muka.
11 Kua fakafoufou e koe e tau ke he hāu a totonu; ko e hāu a tau puhala kua hihina hifo ai e tau mena lolo.
12 Kua hihina hifo e tau kaina he vao; ko e tau mouga foki kua agaagai ia ke he fiafia.
13 Ko e tau mena ke totolo ai e tau manu kua ufitia ia he tau fuifui mamoe; kua ufitia foki e tau pahua he tau saito; kua kalaga fiafia a lautolu, kua lologo ni.