Tau Salamo 66:1-20
66 KO mutolu ko e lalolagi oti kana, kia kalaga atu ā ke he Atua.
2 Kia lologo atu a mutolu ke he hana higoa lilifu; kia fakalilifu a mutolu ke he hana fakahekeaga.
3 Kia pehe atu a mutolu ke he Atua, Kua matakutakuina a koe ke he hāu a tau gahua! Ko e hāu a malolo lahi ke fakatokolalo fakatupua ai kia koe a lautolu ne fai fi kia koe.
4 To hufeilo kia koe e lalolagi oti; ti lologo a lautolu kia koe, to lologo ke he hāu a higoa. Sila.
5 O mai a, kia kitekite a mutolu ke he tau gahua he Atua; kua matakutakuina a ia ke he tau mena ne eke e ia ke he fanau he tau tagata.
6 Ne faliu e ia e tahi ke he kelekele momo; ne o atu a lautolu ke he vailele ke he tau hui ha lautolu; ne fiafia a tautolu kia ia ke he mena ia.
7 Kua pule a ia tukulagi he hana ni a malolo; kua kitekite hana na fofoga ke he tau motu kehe; ko lautolu ne fakafualoto aua neke fakatokoluga a lautolu. Sila.
8 Ko e tau motu na e, kia fakaaue ā ke he ha tautolu a Atua; kia logona mai e leo he hana fakahekeaga.
9 Ko ia ne tuku mai e moui ki loto ia tautolu, ti nakai tuku e ia e tautolu ke heke ha tautolu a tau hui.
10 Ha kua kumikumi e koe kia mautolu, ko e Atua na e; kua kamatamata e koe a mautolu tuga ne kamatamata e ario.
11 Ne takitaki e koe a mautolu ke he kupega; ne tuku e koe e mena mamafa ke he ha mautolu a tau tua.
12 Ne fakaheke e koe e tau tagata ke he tau ulu ha mautolu; ne o a mautolu ke he hala afi mo e hala vai; ka kua takitaki mai e koe a mautolu ke he muhu mena.
13 To fina atu au ke he hāu a fale mo e tau poa huhunu; to ta atu e au kia koe e tau mena ne omonuo ai au.
14 Ko e tau mena ne tala atu he haku a tau laugutu, ne vagahau atu haku gutu ke he haku a matematekelea.
15 To ta atu foki e au kia koe e tau poa huhunu he tau manu gako, katoa mo e tau mena manogi he tau mamoe tane; to taute e au e tau povi tane, katoa mo e tau koti tane. Sila.
16 O mai ā, ko mutolu oti kua matakutaku ke he Atua, mo e fanogonogo mai, to tokutoku atu e au e tau mena ne eke e ia mo e haku a agaga.
17 Ne ui atu au kia ia ke he haku a gutu, kua fakaheke foki au kia ia ke he haku a alelo.
18 Ane manatu au ke he taha mahani hepehepe ke he hoku loto, po kua nakai fanogonogo mai e Iki kia au.
19 Ka kua fanogonogo mai e Atua kia au; kua hagao mai a ia ke he leo he haku a liogi.
20 Kia fakaaue ke he Atua, kua nakai haga kehe a ia mo e haku a liogi, ti nakai hiki hana fakaalofa kia au.