Tau Salamo 68:1-35
68 KIA tu mai e Atua, kia fakamavehevehe a lautolu kua fai fi kia ia; kia fehola kehe foki ia ia a lautolu kua fakavihia a ia.
2 Tuga ne havilia e ahua afi, kia fakahavilia pihia e koe a lautolu; tuga ne pili kua liu puke vai ki mua he afi, kia mahakava pihia ki mua he Atua e tau tagata mahani kelea.
3 Ka ko e tau tagata tututonu, kia fiafia a lautolu, kia kolikoli ki mua he Atua; kia fiafia lahi ni a lautolu.
4 Kia lologo atu a mutolu ke he Atua, kia uhu lologo ke he hana higoa; kia taute ā e puhala mo ia kua haele ke he tau tutakale; ko Iohā hana higoa, kia olioli a mutolu ki mua hana.
5 Ko e matua a ia kia lautolu kua nakai fai matua, ko e fakafili foki a ia ke he tau fifine takape, ko e Atua haia ha ha he hana haeleaga tapu.
6 Ne fakanofo kaina he Atua a lautolu kua tagitagimoki; ko ia ne takitaki mai a lautolu kua lili ke he mena ke monuina ai; ka ko lautolu kua fakafualoto, to nonofo a lautolu ke he motu paku lā.
7 Ko e Atua na e, ne mua a koe ki mua hau a motu, ne haele atu a koe ke he tutakale. Sila.
8 To vivivivi ai e lalolagi, ne hihina hifo foki e lagi ki mua he Atua; ko Sinai ni ne vivivivi a ia ki mua ha Atua, ko e Atua a Isaraela.
9 Ko e Atua na e, ne gana hifo e koe e uha lahi; ko e hāu a tau tagata kua nakai fahia, ko koe ne fakamalolo a lautolu.
10 Ne nofo i ai hāu a fakapotopotoaga; ko e Atua na e, ko e hāu a fakaalofa kua taute ai e koe mo ia kua matematekelea.
11 Kua vagahau mai e Iki ke he kupu; kua lahi e kau ha lautolu ne fakamatala.
12 Ne fehola e tau patuiki he tau kau, ne fehola ni a lautolu; ko e fifine foki ne nofo fale kua tufatufa e ia e tau mena ne fofo mai.
13 Ne tatakoto a mutolu ke he vaha he tau katofia, ti tuga ne tau tapakau lupe a mutolu kua ufiufi he ario, mo e hana tau fulu kua ufiufi ke he auro ago kikila.
14 Ne fakamavehevehe ai e tau patuiki e Ia hana e malolo oti kana, ti hina ai tuga ne kiona i Salemoni.
15 Ko e mouga, ko Vasana, ko e mouga he Atua ia; ko e mouga ko Vasana ko e atu mouga ni a ia.
16 Ko e atu mouga na e, ko e ha kia ne takahao ai a mutolu? ko e mouga nai kua finagalo ki ai e Atua mo haeleaga hana; haia ni, to nofo ai a Iehova tukulagi.
17 Ko e tau kariota he Atua, ne uafulu e afe ia, ti afe ni mo afe; ha i ai ia lautolu e Iki tuga ne ha i ai a Sinai ke he mena tapu.
18 Ne haele hake a koe ke he mena tokoluga, ne takitaki e koe e tau tagata ne fofo ke he fakapaeaaga; ne moua e koe e tau mena fakaalofa mo e tau tagata, ko lautolu kua fakafualoto ni, kia nofo ai a Iohā ko e Atua.
19 Kia fakaaue ke he Iki ke he taha aho mo e taha aho; kua tuku e tau kavega ki luga ia tautolu, ko e Atua ko e ha tautolu a fakamouiaga ia. Sila.
20 Ko e ha tautolu a Atua ko e Atua he fakamouiaga ia; ha ia Iehova e Iki ke fakahao mai he mate.
21 Ko e moli, to ihi ni he Atua e tau ulu ha lautolu ne fai fi kia ia, ko e tumuaki ulu hana kua feiga ke he hana tau hala.
22 Kua pehe mai e Iki, To liuaki e au mai Vasana, to liuaki mai e au mai he hokulo he moana;
23 Kia fuifui ai hāu a hui ke he toto; kia epoepo foki e tau alelo he tau kuli hāu ke he toto ha lautolu oti kana kua fai fi kia koe.
24 Ko e Atua na e, kua kitia e lautolu hāu a haele atu; ko e haele atu he haku a Atua, mo e haku a Patuiki ke he faituga.
25 Kua mumua a lautolu ne lologo, ti mumui atu a lautolu ne ta akau fakatagi; ha he vaha loto he tau tamafine tā topā.
26 Kia fakaaue ke he Atua ke he fakapotopotoaga, ko e Iki ni, ko mutolu ne tutupu mai ia Isaraela.
27 Ha i ai a Peniamina ne fakamuiaki, kua kautu a ia kia lautolu; ko e tau iki a Iuta kua tauliti maka kia lautolu; ko e tau iki a Sepulona katoa mo e tau iki a Nafatali.
28 Kua pule hāu a Atua ke malolo a koe; ko e Atua na e, kia fakamalolo a koe ke he mena kua eke e koe ma mautolu.
29 To ta atu e tau patuiki e tau mena fakaalofa kia koe, ha ko e hau a faituga i Ierusalema.
30 Kia akonaki e koe e tau manu ha he ulu kaho, katoa mo e fuifui povi malolo, mo e tau punua povi he motu, kua hufeilo mai mo e tau kapa ario; kua fakamavehevehe e ia e tau motu kua fiafia ke tau.
31 To o mai foki e tau iki lalahi i Aikupito; to fakaolo vave atu e Aitiope hana tau lima ke he Atua.
32 Ko mutolu ko e tau kautu he lalolagi, kia lologo atu a ke he Atua; kia uhu lologo a mutolu ke he Iki; Sila;
33 Ko ia kua heke e lagi, ko e lagi i tuai tigahau; kitiala, kua vagahau mai hana leo, ko e leo malolo.
34 Kia tuku atu e mutolu e malolo ke he Atua; ha i luga ia Isaraela hana lilifu, ha he tau aolagi foki hana malolo.
35 Ko e Atua na e, kua matakutakuina a koe mai he hau a tau haeleaga tapu; ko e Atua a Isaraela ko ia ne tuku mai e malolo, mo e toa ke he hana motu. Kia fakaaue ā ke he Atua.