Tau Salamo 72:1-20
72 KO e Atua na e, kia ta atu e koe hāu a tau fakakiteaga ke he Patuiki, mo e hāu a tututonu ke he tama he Patuiki.
2 To fakafili e ia hāu a motu mo e tututonu, to fakafili foki mo e tonu hāu a tau tagata matematekelea.
3 To fua mai he tau mouga e monuina ma e motu, ko e tau matiketike foki to fua mai ke he tututonu.
4 To fakafili e ia e tau tagata matematekelea he motu; to fakamoui foki e ia e fanau ha lautolu ne nofogati, ka e lipilipi e ia a ia ne favale.
5 To matakutaku e tau tagata kia koe, ka tumau e la mo e mahina, ke he taha hau mo e taha hau.
6 To hifo a ia tuga ne uha ke he motietie kua helehele, tuga ne tau mana ne fakamalū aki e kelekele.
7 Ko e hana vaha ke tupuolamoui ai e tau tagata tututonu; to monuina lahi ai, ato nakai fai mahina.
8 To pule foki a ia ke kamata ke he taha tahi ato hoko ke he taha tahi; ke kamata ke he vai lele to hoko ke he tau kala he lalolagi.
9 To hufeilo foki ki mua hana a lautolu kua nonofo ke he tutakale, to epoepo e efuefu a lautolu ne fai fi kia ia.
10 Ko e tau patuiki a Tasesa mo e tau motu kua takai he tahi to uta mena fakaalofa e lautolu; ko e tau patuiki a Sihipa mo Sipa to uta e lautolu e mena foaki noa kia ia.
11 To hufeilo kia ia e tau patuiki oti; to fekafekau kia ia e tau motu oti.
12 Ha ko e mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai.
13 To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati.
14 To laveaki e ia a lautolu mai he favale mo e mahani kelea; ko e mena uho foki ha lautolu a tau toto kia ia.
15 To moui foki a ia, ke ta atu foki kia ia e falu a auro mai Sihipa; to liogi foki e lautolu māna nakai noa; to fakaaue kia ia ke he aho oti.
16 To ha i ai e puke aloalolima he tau saito ke he motu, ki luga he fuga mouga; ti gatiti ai hana tau fua tuga a Lepanona; to tupuolamoui e tau tagata he maga tuga ne tau lau kou he kelekele.
17 To tukulagi hana higoa; to tumau hana higoa ka ha i ai e la; to fakamonuina foki he tau tagata a lautolu ha ko ia ni; to fakamonuina a ia he tau motu oti kana.
18 Kia fakamonu kia Iehova e Atua, ko e Atua a Isaraela; hokoia ni ne eke mana.
19 Kia fakaheke ke he hana higoa lilifu tukulagi ni; kia puke e lalolagi oti ke he hana lilifu; Amene mo Amene.
20 Kua fakahiku tuai e tau liogi a Tavita e tama a Iese.