Tau Salamo 73:1-28
73 KO e mitaki hokoia e mahani he Atua kia Isaraela, ko lautolu kua loto meā.
2 Ka ko au nai, fetamakina kua tupetupe haku tau hui; toe tote ni ti heke haku tau hui;
3 Ha kua mahekeheke na au kia lautolu ne goagoa; ne kitekite au ke he monuina he tau tagata mahani kelea.
4 Ha kua nakai matematekelea a lautolu ke hoko ke he mate; ti lalahi ni ha lautolu a tau tino.
5 Ko e matematekelea he tau tagata nakai hoko ia kia lautolu, nakai malaia a lautolu tuga ne falu a tagata.
6 Ko e mena ia kua kahoa ai a lautolu ke he fakatokoluga; ka e favale foki kua eke ia mo tapulu ke tapulu ai a lautolu.
7 Kua Iuta e tau mata ha lautolu he gako; kua puapuā e tau manatu he tau loto ha lautolu.
8 Kua va e lautolu mo e vagahau kelea ke he favale; kua vagahau fakatokoluga a lautolu.
9 Kua hake e tau gutu ha lautolu ke he lagi, kua o fano foki e tau alelo ha lautolu ke he lalolagi.
10 Ko e mena ia ne mafoki mai ai ki hinei hana tau tagata; to fakainu a lautolu ke he vai lahi.
11 Kua pehe a lautolu, To fioia fefe e Atua? Po ke fioia kia e ia ne Mua ue atu?
12 Kitiala, ko lautolu nai ko e tau tagata mahani kelea ia, kua monuina ke he mouiaga nai; kua fakalahi e koloa.
13 Ko e moli ni kua fakameā teao e au haku loto; ti kua holoholo e au haku tau lima neke hala au, ka e teao ni.
14 Kua fahi ni au ke he aho oti; kua akonaki au ke he tau magaaho pogipogi oti.
15 Kaeke ke pehe au, To talahau atu pihia e au; kitiala, ti fakavai ai e au e hau he hāu a fanau.
16 Ne manamanatu na au ke iloa ai e mena nai; ko e mena mamahi ni ia ke he haku a manatu;
17 Kua hoko ke he aho ne fina atu ai au ke he faituga he Atua; ti kitia ai e au ha lautolu a fakahikuaga.
18 Ko e moli, ne tuku e koe a lautolu ke he tau mena momole; ke fakato hifo e koe a lautolu ke he tau mena kua moumou.
19 Oi te! ko e magaaho tote ni kua moumou ai a lautolu; kua mahaikava a lautolu, kua fakaotioti a lautolu ha ko e tau mena fakahopo ate.
20 Tuga ne miti ka ala taha, to pihia foki a koe ma Iki na e, ka matike mai a koe ti fakalialia a koe ha lautolu a ata.
21 Ha ko e mena ne fakamamahi hoku loto, ne tuina foki au ke he haku manatu.
22 Ko au foki, ne goagoa na au mo e nakai iloa; tuga ne manu hui fa au ki mua hāu;
23 Ka e pete ia kua fakalataha agaia a taua mo koe; ne toto e koe haku lima matau.
24 To takitaki e koe au he hāu a pule; ka mole ia, ti talia ni e koe au ke he monuina.
25 Ko hai kia ha ha ia au ke he lagi? hoko koe foki ne fiafia ki ai au ke he lalolagi.
26 Ai tuai fahia hoku tino mo e hoku loto, ka ko e Atua ko e maka tumau ia he haku a loto, ko ia foki ke eke māku tukulagi.
27 Ha ko e mena, kitiala, to mahaikava a lautolu kua fakamamao mo koe; kua fakaotioti e koe a lautolu oti kua o kehe ia koe ke faivao ai.
28 Ka ko au, ko e mitaki kia au ke fakatata ke he Atua; kua eke e au e Iki ko Iehova mo kolo haku, kia talahau atu e au hāu a tau gahua oti.