Tau Salamo 74:1-23
74 KO e Atua na e, ko e ha kia ne tiaki tukulagi ai e koe a mautolu? ko e ha ne ahua hake ai hāu a ita ke he fuifui mamoe ne fagai e koe?
2 Kia manatu e koe e fakapotopotoaga hāu ne fakafua e koe ne aho mua; ko e kaina he hāu a fonua ne laveaki e koe; ko e mouga nai ko Siona ne haele ai a koe.
3 Kia haele hake a koe ke he tau mena kua moumou tukulagi; ko lautolu kua fai fi mai kua fakakelea e tau mena oti ke he faituga.
4 Kua fakatutu ki mua he hāu a tau fakapotopotoaga a lautolu ne ita kia koe; kua fakatu e lautolu ha lautolu a fakamailoga mo fakamailoga.
5 Kua iloa a lautolu tuga ne tagata ne nikiti hake e toki ke hio aki e tau akau lālā loga.
6 Ko e hanai, kua oti kana hana tau mena foufou he moumou e lautolu ke he tau toki mo e tau hamala.
7 Kua huhunu e lautolu hāu a faituga ke he afi, kua taholi ke he kelekele e lautolu e faituga ha i ai hāu a higoa.
8 Kua pehe age a lautolu ke he ha lautolu a tau loto, Kia moumou fakalataha e tautolu a lautolu; kua huhunu e lautolu e tau mena oti he motu ne eke ai e tau fakapotopotoaga ke he Atua.
9 Kua nakai kitia e tautolu ha tautolu a tau fakamailoga; nakai tuai fai perofeta; ti nakai ha i ai foki taha ia tautolu ke iloa po ke fakahiku a fe e tau mena ia.
10 Ko e Atua na e, to ekefakakelea mai e ia ne ita mai ato a fe? to tukulagi kia he fakalialia mai ke he hāu a higoa a ia ne fai fi mai?
11 Ko e ha kia ne liuaki atu ai hāu a lima, ko e hāu a lima matau? Kia āki mai ai e koe mai he hāu a fatafata, kia fakaoti e koe a lautolu.
12 Ka ko e Atua, ko e haku a Patuiki a ia tali mai i tuai; kua gahua a ia ke fakamoui ai ki mua he lalolagi.
13 Ne vevehe ua e koe e tahi ke he hāu a mana; ne ihiihi e koe e tau ulu he tau tanimo ha he vai.
14 Ko e tau ulu ni a leviatana ne tuki malipilipi e koe; ne tuku e koe a ia mo mena kai ma e tau tagata kua nonofo tutakale.
15 Ko koe ni ne ihi e vai puna mo e vai lele; ko koe ni ne maha ai e tau vai lele ne lele mau.
16 Ha ha ia koe ni e aho, haia, ha ha ia koe foki mo e po; ko koe ni ne taute e maama mo e la.
17 Ko koe ni ne tuku e tau katofia oti he lalolagi; ko e tau mafana mo e tau makalili, ko koe ni ne eke.
18 Kia manatu e koe e mena nai kua fakafiu a Iehova e ia ne fai fi mai; ko e motu goagoa foki kua fakalialia e lautolu hāu a higoa.
19 Aua neke tuku atu hāu a kulukulu ke he fuifui manu favale; aua neke nimo tukulagi ia koe hāu a lanu tagata matematekelea.
20 Kia manatu e koe e maveheaga; ha kua puke e tau mena pouli he lalolagi ke he tau mena kua nofo ai e favale.
21 Aua foki neke liliu mai mo e mā e lautolu ne favale ki ai; ka kia fakaheke atu ke he hāu a higoa e tagata matematekelea, mo e nofogati.
22 Ko e Atua na e, kia tu mai ā, mo e eke hāu a fetoko; kia manatu e koe e ekefakakelea kia koe he tau tagata goagoa ke he aho oti.
23 Aua neke nimo ia koe e leo hana kua fai fi kia koe, kua hake mau e go ha lautolu ne tutu atu kia koe.