Tau Salamo 76:1-12
76 KUA iloa e Atua i Iuta; kua mua hana higoa i Isaraela.
2 Ha i Salema foki hana fale uta fano; ha i Siona foki hana haeleaga.
3 Ne fafati e ia ke he mena ia e tau fana puho mai he kaufana ko e akau punuti, ko e pelu, mo e tau. Sila.
4 Kua kikila a koe, kua lilifu a koe kua mua ni ke he tau mouga ha i ai e tau mena fofo.
5 Kua fofo e tau mena ha lautolu kua fakamanavalahi; kua momohe a lautolu ke he ha lautolu a mohe; mo e tau tagata oti ne malolo nakai moua e lautolu ha lautolu ni a tau lima.
6 Ko e Atua a Iakopo na e, ko e akonakiaga mai ia koe kua pulumohea ai e kariota katoa mo e solofanua.
7 Ko koe ni kua matakutakuina a koe; ko hai foki ke tu atu ki mua hāu ka ita mai ai a koe?
8 Ko koe ni ne logona mai ai e mautolu e fakafiliaga mai he lagi; ne matakutaku ai e lalolagi mo e nonofo fakatekiteki,
9 He tu mai e Atua ke fakafili ai, ke fakamoui ai foki a lautolu oti ne matematekelea ha he lalolagi. Sila.
10 Ha ko e ita he tau tagata to fakaheke ai kia koe; ko e ita foki kua toe to taofi e koe.
11 Kia omonuo atu a mutolu kia Iehova ha mutolu a Atua, ti ta atu e tau mena, ko mutolu oti ne agaagai kia ia; kia uta mena fakaalofa kia ia kua matakutakuina.
12 To motuhia e ia e fafagu he tau iki; kia matakutaku kia ia e tau patuiki he lalolagi.