Tau Salamo 77:1-20
77 NE tagi atu au ke he Atua ke he leo haku, ne tagi atu au ke he Atua; ti fanogonogo mai ai kia au.
2 Ko e aho ne matematekelea ai au ne kumi ai e au ke he Iki; ne fakaolo e au haku lima ke he po, ti nakai ahumate ni; kua nakai mafai haku loto ke fakamafanatia.
3 Ne manatu au ke he Atua ti fakaatukehe na au; ka manamanatu au, ti lolelole ai haku a loto. Sila.
4 Ne taofi e koe haku tau mata neke fia mohe au; kua fakaatukehe na au; ti nakai maeke ia au ke vagahau.
5 Kua manatu e au e tau aho i tuai; ko e tau tau tigahau.
6 Ne manatu e au haku a lologo ke he po; ne manamanatu e au ke he haku a loto; ne kumikumi foki haku agaga.
7 To tiaki tukulagi kia he Iki? nakai kia liu foki fiafia a ia?
8 Kua fakahiku fakaoti kia hana fakaalofa? kua motuhia kia hana vagahau ke hahau mo hahau?
9 Kua nimo kia ke he Atua ke fakaalofa mai? kua taofi kia e ia ke he ita e fakaalofa hofihofi hana? Sila.
10 Ti pehe atu ai au, Ko e haku a mamahi hanai, ko e tau tau he lima matau hana kua Mua ue atu.
11 To manatu e au e tau gahua a Iohā; ko e moli, to manatu ni e au hāu a tau mana i tuai.
12 To manamanatu foki e au hāu a tau gahua oti, ti manamanatu e au e tau mena ne eke e koe.
13 Ko e Atua na e, ha ha he faituga hāu a puhala; ko hai kia e taha atua lahi ke tuga e Atua?
14 Ko koe ni ko e Atua ne eke mana; ne fakakite e koe hāu a malolo ke he tau motu.
15 Ne laveaki e koe ke he hāu a lima e motu hāu, ko e fanau a Iakopo mo Iosefa. Sila.
16 Ne kitia he tahi a koe ko e Atua na e; ne kitia he tahi a koe; ne vivivivi a ia, haia ni, ne gahuahua ni e moana.
17 Ne liligi hifo he tau aolagi e vai; ne pakū mai e lagi; haia, kua o fano hāu a tau fana.
18 Ko e leo he hāu a pakulagi ha ha he hiohio a ia; kua maamatia e lalolagi he uhila; kua luelue mo e vivivivi e lalolagi.
19 Ha he tahi hāu a puhala, ha he vai lahi foki hāu a haeleaga, ko e tau tuaga ve foki hāu nakai kitia ia.
20 Ne takitaki e koe hāu a motu tuga ne fuifui mamoe ke he lima a Mose mo Arona.