Tau Salamo 84:1-12
84 IEHOVA Sapaota na e, kua homo e mitaki he hāu a tau haeleaga.
2 Kua manako lahi haku agaga mo e mate au he fia fina atu ke he tau lotopā a Iehova; kua kalaga fiafia haku loto mo e hoku tino ke he Atua moui.
3 Ko e moli, kua moua he manu lele e fale, ko e pekapeka foki kua fai fata ke tuku ai hana tau punua, ko e hāu a tau fatapoa haia Iehova Sapaota na e, ko e haku a Patuiki mo e haku Atua.
4 Uhoaki a lautolu kua nonofo ke he hāu a fale; to fakaheke mau a lautolu kia koe. Sila.
5 Uhoaki e tagata ha ia koe hana malolo; ha ha he tau loto ha lautolu e tau puhala tanu.
6 Kua o age a lautolu ke he hala he pahua a Pēka, ti eke ai e lautolu a ia mo vai puna; kua ufitia ai ke he monuina ha ko e tau uha fakamua.
7 To o a lautolu mo e malolo tupu mau; to kitia a lautolu ki mua he Atua i Siona.
8 Iehova na e, ko e Atua Sapaota, kia fanogonogo mai a koe ke he haku liogi; ko e Atua a Iakopo na e, kia fakateliga mai ā. Sila.
9 Ko e Atua na e, ha mautolu a akau punuti, kia kitekite mai a koe, kia kitekite mai ke he mata hana ne fakauku e koe.
10 Ha kua mua e mitaki he aho taha ke he hāu a tau lotopā, ke he taha afe e tau aho kehe. Kua mua haku a manako ke tu ke he gutuhala he fale he haku a Atua, ke he manako ke nofo ke he tau fale ia he tau tagata mahani kelea.
11 Ha ko Iehova, ko e Atua, ko e la ni a ia mo e akau punuti; to foaki mai e Iehova e fakaalofa noa mo e lilifu; nakai lamakai a ia ke he taha mena mitaki kia lautolu kua hakohako ha lautolu a puhala.
12 Iehova Sapaota na e, uhoaki e tagata kua tua kia koe.