Tau Salamo 85:1-13
85 IEHOVA na e, ne fiafia a koe ke he hāu a motu; ne liuaki mai e koe e fakapaeaga a Iakopo.
2 Ne fakamagalo e koe e tau mahani hepehepe he hāu a motu, ne ufiufi e koe ha lautolu a tau hala oti kana. Sila.
3 Ne uta kehe e koe hāu a tau ita oti kana; ne mafoki kehe e koe hāu a ita lahi.
4 Ko e Atua na e, ha mautolu a fakamouiaga, kia liuaki mai e koe a mautolu; kia fakahiku e koe hāu a ita kia mautolu.
5 To tukulagi kia hāu a ita mai kia mautolu? to fakaloa kia hāu a ita ke he taha hau mo e taha hau?
6 Nakai kia liu fakamoui mai e koe a mautolu; kia fiafia ai hāu a motu kia koe?
7 Iehova na e, kia fakakite e koe kia mautolu hāu a fakaalofa; kia foaki mai e koe kia mautolu e fakamouiaga mai ia koe.
8 To fanogonogo au ke he tau mena ke talahau mai e Iehova ko e Atua; ha ko e mena talahau monuina e ia ke he hana motu katoa mo e hana tau tagata tapu; ka e aua neke liliu a lautolu ke he mahani goagoa.
9 Ko e moli, kua tata ni hana fakamouiaga kia lautolu kua matakutaku kia ia; kia tumau ai e lilifu ke he motu ha tautolu.
10 Ko e fakaalofa mo e fakamoli kua feleveia a laua; kua taufigita e tututonu mo e mafola.
11 To tupu hake e fakamoli mai he lalolagi; to kitekite hifo foki e tututonu mai he lagi.
12 To foaki mai foki e Iehova e monuina; to fua mai foki ha tautolu a kelekele ke he hana tau fua.
13 To mua atu ki mua hana e tututonu; ti fakatumau foki hana tau tuagahui mo puhala.