Tau Salamo 89:1-52
89 KO e fakaalofa a Iehova ke lologo ai au tukulagi; to fakailoa atu ke he haku gutu hāu a fakamoli ke he taha hau mo e taha hau.
2 Ha kua pehe age au, To ati hake e fakaalofa ke tukulagi; to fakatumau foki ke he lagi hāu a fakamoli.
3 Kua eke e au e maveheaga mo ia ne fifili e au, ne omonuo ni au kia Tavita haku a fekafekau,
4 Ke fakatumau tukulagi e au hāu a fanau; ke ati hake hāu a nofoaiki ke he taha hau mo e taha hau. Sila.
5 Iehova na e, to fakaheke he lagi ke he hāu a tau mana; to fakaheke foki ke he hāu a fakamoli ke he fakapotopotoaga ha lautolu kua tapu.
6 Ha ko hai kia ha he lagi ke tatai mo Iehova? ko hai taha he fanau he tau toa ke tuga a Iehova?
7 Ko e Atua ke matakutaku lahi ki ai ke he fakapotopotoaga ha lautolu kua tapu; haia, ko ia ke matakutaku ki ai, a lautolu oti kana ne agaagai kia ia.
8 Iehova na e, ko e Atua Sapaota, ko hai kia ke malolo tuga a koe, Ioha na e? kua agaagai foki a koe he hāu a fakamoli.
9 Ko koe ni kua pule ke he fakatokoluga he tahi; ka loka hana tau peau, ko koe ni ke maha ai.
10 Ko koe ne lipilipi a Raava tuga ne taha kua keli ke he tau; ko e hāu a lima malolo ne fakamavehevehe a lautolu ne fai fi kia koe.
11 Ko e hāu ni e lagi, ko e hāu foki e lalolagi; ko koe foki ne fakave e lalolagi mo e tau mena oti ne puke ai.
12 Ko koe ni ne eke e fahi tokelau katoa mo e fahi toga; ko Tapora mo Heremoni to fiafia a laua ke he hau a higoa.
13 Ha ia koe e lima malolo; kua malolo hāu a lima, kua tokoluga hāu a lima matau.
14 Ko e tututonu mo e fakafiliaga ne tumau ai hāu a nofoaiki; kua mumua e fakaalofa mo e fakamoli ki mua hāu.
15 Uhoaki e motu kua iloa e leo fiafia; Iehova na e, to o fano a lautolu ke he maama he hāu a fofoga.
16 To fiafia a lautolu ke he hāu a higoa ke he aho oti; ko e hāu a tututonu foki ke fakamatalahi ai a lautolu.
17 Ha ko koe ko e fulufuluola ia ha lautolu ha i ai e malolo; ko e hāu a finagalo fakaalofa foki kua fakatokoluga ai ha mautolu a koe.
18 Ha ko Iehova, ha mautolu a akau punuti a ia; ko ia foki kua Tapu i Isaraela, ha mautolu a Patuiki a ia.
19 Ti vagahau ai a koe ke he fakakiteaga ke he hāu a tagata tapu, mo e pehe age a hoe, Kua tuku atu e au e lagomatai ke he taha ne malolo; kua fakatu hake e au taha kua fifili mai he motu.
20 Kua moua e au a Tavita, ko e haku a fekafekau; kua fakauku e au a ia ke he haku a lolo tapu;
21 Ko ia ke tumau i ai haku a lima; to fakamalolo foki he haku lima a ia.
22 Nakai favale kia ia a ia ne fai fi ki ai; ti nakai fakamamahi foki a ia he tagata mahani kelea.
23 To tuki hifo e au ki mua hana a lautolu ne fai fi kia ia; to ta foki e au a lautolu ne fakavihia a ia.
24 To ha ia ia haku a fakamoli mo e haku a fakaalofa; ko e haku a higoa foki ke fakatokoluga ai e hoe hana.
25 To fakahoko atu foki e au hana lima ke he tahi, mo e hana lima matau ke he vai lele.
26 To ui mai a ia kia au, Ko e haku Matua a koe, ko e haku Atua, mo e maka tumau he haku a fakamouiaga.
27 Ko au foki, to eke e au a ia mo tama uluaki, ke mua a ia ke he tau patuiki he lalo lagi.
28 To tumau haku a fakaalofa kia ia tukulagi; to fakamoli foki haku a maveheaga kia ia.
29 To kotofa e au hana fanau ke tumau tukulagi, ko e hana nofoaiki foki kia tuga e tau aho he lagi.
30 Kaeke ke tiaki haku tau fakatufono he hana fanau, mo e nakai o a lautolu ke he hala he haku a tau fakafiliaga;
31 Kaeke ke holi e lautolu haku a tau fakatufono, mo e nakai omaoma ke he haku a tau poaki.
32 Ti ahiahi e au ha lautolu a holifono mo e fahi, to ahiahi foki ha lautolu a mahani kelea mo e tau ta.
33 Ka e nakai motuhia haku a fakaalofa kia ia, ti nakai fakavai foki au ke he haku a fakamoli.
34 Nakai tiaki e au haku a maveheaga, ti nakai hiki e au e tau kupu ne hopo atu he haku tau laugutu.
35 Ko e taha mena kua omonuo au mo e haku a tapu, nakai fakai ke pikopiko au kia Tavita.
36 To tumau tukulagi hana fanau, ko e hana nofoaiki foki ke tuga e la ia ki mua haku.
37 To fakatumau tukulagi a ia tuga ne mahina, mo e talahau ha he lagi kua fakamoli. Sila.
38 Ka kua tiaki mo e fakavihia e koe, ti ita lahi a koe kia ia ne fakauku e koe.
39 Kua fakahui e koe e maveheaga he hāu a fekafekau; kua taholi hana foufou iki ke he kelekele.
40 Kua ulu ki lalo e koe hana tau pa oti kana; kua eke e koe hana tau kolo mo mena kua moumou.
41 Kua fofo hana tau mena e lautolu oti kana ne o age ke he puhala; kua fakama a ia ki mua ha lautolu oti ne katofia mo ia.
42 Kua fakatokoluga e koe e lima matau ha lautolu ne ita kia ia; kua fakafiafia e koe a lautolu oti kua fai fi kia ia.
43 Kua mafoki kehe foki e koe e mata he hana pelu, mo e nakai fakatumau e koe a ia ke he tau.
44 Kua fakahiku e koe hana lilifu; kua liti e koe ki lalo ke he kelekele hana nofoaiki.
45 Kua fakaku e koe e tau aho he hana fuata; kua fakatapulu e koe a ia ke he mā. Sila.
46 Iehova na e, to fakamumuli a koe ato a fe? to tukulagi kia? to vela hāu a ita tuga ne afi ato a fe?
47 Kia manatu e koe ko e mena noa haku a moui; ko e heigoa e mena kua eke teao ai e koe e tau fanau oti he tau tagata?
48 Ko hai kia e tagata moui, ti nakai kitia e ia e mate? ke laveaki kia e ia a ia mai he lima he tukuaga? Sila.
49 Ko e Iki na e, ko fe hāu a fakaalofa ne aho mua, ne omonuo ai a koe ke he hāu a fakamoli kia Tavita?
50 Ko e Iki na e, kia manatu e koe e ma he hāu a tau fekafekau; kua uta fano e au ke he haku a fatafata e tau kupu oti he tau motu loga;
51 Kua ekefakakelea mai ai e lautolu kua fai fi kia koe Iehova na e; kua ekefakakelea ai e lautolu kia ia ne fakauku e koe.
52 Kia fakamonu kia Iehova tukulagi ni. Amene mo Amene.