Tau Salamo 9:1-20
9 TO fakaheke atu au kia koe, Iehova na e, mo e haku a loto katoa; ti totoku atu foki e au hāu a tau mana oti.
2 To fiafia au mo e olioli au kia koe; to uhu lologo au ke he hāu a higoa, ko koe ne Mua ue atu.
3 Ne liliu atu a lautolu kua fai fi kia au; ti tupetupe ai a lautolu;mo e mahaikava a lautolu ki mua hāu.
4 Ha kua eke e koe haku a fakafiliaga mo e haku a taofi tonu; kua nofo a koe ke he nofoaiki ke fakafili tonu ai.
5 Kua akonaki e koe e tau motu kehe; kua fakamahakava e koe a lautolu ne mahani kelea, kua holoholo kehe e koe ha lautolu a higoa tukulagi tukumuitea.
6 Ko lautolu ne ita mai, kua fakahiku fakaoti he moumou; kua ulu ki lalo e koe ha lautolu a tau maga; kua mole atu tuai e fakamanatuaga ha lautolu.
7 Ka ko Iehova, to nofo a ia tukulagi ni; kua fakatu e ia hana nofoaiki ke fakafili ai.
8 Ko ia ni, to fakafili e ia e lalolagi mo e tonu; to fakafili e ia e tau tagata mo e hako.
9 To eke a Iehova mo kolo tokoluga ma lautolu ne malipilipi, ko e kolo tokoluga ke he tau vaha matematekelea.
10 To tua kia koe a lautolu kua iloa hāu a higoa, ha ko e mena nakai tiaki e koe, Iehova na e, a lautolu kua kumi kia koe.
11 Kia lologo atu ā mutolu kia Iehova, ko ia kua nofo i Siona; kia fakailoa atu ke he tau motu hana tau mena ne eke.
12 Ha ko ia kua kumi ke he tau toto kua manatu a ia kia lautolu; ti nakai fakanimonimo e ia e tagi ha lautolu kua matematekelea.
13 Iehova na e, fakaalofa mai kia au, kia fofoga mai ke he haku a matematekelea ne tupu mai ia lautolu ne fakavihia mai kia au, ko koe na kua ta hake au mai he tau gutuhala he mate;
14 Kia talahau atu ai e au hāu e fakahekeaga oti kana ke he tau gutuhala he tama fifine a Siona; to fiafia na au ke he fakamouiaga hāu.
15 Kua tomo hifo e tau motu kehe ke he pahua ne eke e lautolu; ko e kupega ni ne fufu e lautolu kua vihi ai ha lautolu a tau hui.
16 Kua iloa a Iehova he fakafiliaga ne eke e ia; kua hele e tagata mahani kelea ke he gahua he hana tau lima. Hikaiona. Sila.
17 To fuluhi atu ki seoli a lautolu kua mahani kelea, ko e tau motu oti kua nimo e Atua.
18 Ha ko e mena nakai nimo fakaoti a lautolu ne nonofogati; ko e amaamanaki foki ha lautolu ne matematekelea nakai tamate fakaoti ia.
19 Iehova na e, kia tu mai a, aua neke kautu e tagata; kia fakafiliina e au motu kehe ki mua hau.
20 Iehova na e, kia fakamatakutaku e koe a lautolu, kia iloa he tau motu kehe ko e tau tagata ni a lautolu. Sila.