Tau Salamo 90:1-17
90 KO e Iki na e, kua eke a koe mo mena ke nonofo ai a mautolu ke he taha hau mo e taha hau.
2 Ka ko e vaha nakala fanau ai e tau mouga, nakala eke foki e koe e lalolagi mo e atu motu, ko e Atua a koe mai i tuai tigahau, to hoko ke he tukulagi.
3 Kua liuaki e koe e tagata ato efuefu a ia; ti pehe mai a koe, Kia liliu mai a mutolu ko e fanau he tau tagata;
4 Ha ko e taha afe he tau tau ki mua hāu, tuga e aho neafi ia ka mole atu, tuga foki e leoleoaga he po.
5 Kua fakatafia e koe a lautolu; ko e mohe a lautolu; tuga ne motietie a lautolu kua moui mai ke he magaaho pogipogi.
6 Ko e mogoho pogipogi kua fiti mo e moui mai ai; ka hoko ke he afiafi, ti helehele ai, kua fifigo ia.
7 Ha kua fakahiku tuai a mautolu he hāu a ita, kua matakutaku a mautolu ke he hāu a ita.
8 Kua tuku e koe ha mautolu a tau mahani kelea ki mua hāu, mo e ha mautolu a tau hala fufu ke he maama he hāu a fofoga.
9 Ha kua mole atu ha mautolu a tau aho oti ke he hāu a ita; kua oti ha mautolu a tau tau tuga ne manatu.
10 Ko e tau aho he tau tau ha mautolu ko e fitu gofulu ia he tau tau, kaeke ko e valu gofulu e tau tau ha kua malolo, ka ko e malolo ha lautolu ha i ai e mamahi mo e matematekelea; ha kua vave hana mole atu, mo e lele kehe a mautolu.
11 Kua iloa e hai e malolo he hāu a ita? ha kua tuga ne matakutakuina a koe, pihia hāu a ita.
12 Kia fakaako mai pihia e koe a mautolu ke totou ha mautolu a tau aho, kia moua ai he tau loto ha mautolu e iloilo.
13 Iehova na e, kia liu mai a koe, ato a fe kia? kia tokihala a koe ha ko e hāu a tau fekafekau.
14 Kia fakamakona e koe a mautolu ke he magaaho pogipogi ke he hāu a fakaalofa; kia kalaga fiafia ai mo e olioli a mautolu ke he tau aho oti ha mautolu.
15 Kia fakafiafia e koe a mautolu tuga ne tau aho ne fakamamahi ai e koe a mautolu, ko e tau tau ne iloa ai e mautolu e kelea.
16 Kia fakakite mai e koe hāu a tau gahua ke he hāu a tau fekafekau, mo e hāu a fulufuluola foki ke he fanau ha lautolu.
17 Kia ha ha i luga ia mautolu e fulufuluola a Iehova ha mautolu a Atua; kia fakamau e koe e gahua he tau lima ha mautolu; ko e gahua ni he tau lima ha mautolu kia fakamau e koe.