Tau Salamo 92:1-15
92 KUA mitaki ke fakaheke atu kia Iehova, mo e uhu lologo ke he hāu a higoa, ko koe kua Mua ue atu.
2 Kia talahau atu foki ke he mogoho pogipogi hāu a fakaalofa, kia talahau atu foki ke he tau po hāu a fakamoli.
3 Ke he akau fakatagi ne hogofulu hana tau filo, mo e napeli, mo e leo he kitara.
4 Ha kua fakafiafia mai e koe au ke he hāu a gahua, Iehova na e; to kalaga fiafia na au ha ko e tau mena ne eke he hāu a tau lima.
5 Iehova na e, kua lahi mahaki ni e tau mena ne eke e koe; kua hokulo lahi hāu a tau manatu.
6 Ko e tagata goagoa nakai iloa e ia; ko e tagata fonu foki nakai kitia e ia e mena nai.
7 Ka tupu hake e tau tagata mahani kelea tuga ne tau vao ikiiki, ka fiti mai foki a lautolu oti kua eke mena kelea, kua pihia ni kia mahaikava a lautolu tukulagi tukumuitea.
8 Ka ko koe, Iehova na e, ko koe kua Mua ue atu ke tukulagi.
9 Ha ko e mena, Iehova na e, kitiala ko lautolu ne fai fi kia koe, ha ko e mena kitiala ko lautolu ne fai fi kia koe, to fakaotioti a lautolu; to fakamavehevehe a lautolu oti kua mahani kelea.
10 Ka kua fakatokoluga e koe haku hoe tuga ne hoe he rema; to fakauku na au ke he puke lolo fou.
11 To kitia foki he haku mata a lautolu kua takahao kia au; to fanogonogo foki haku tau teliga ke he tau tagata mahani kelea kua tutu mai kia au.
12 To tupu hake e tagata tututonu tuga ne pama; to tupu lahi foki tuga ne arasi i Lepanona.
13 Ko lautolu kua to ke he fale a Iehova, to tupuolamoui a lautolu ke he tau lotopā he Atua ha lautolu.
14 Ka hoko ke he vaha fuakau, ti fua agaia a lautolu; to lalahi mo e lauola a lautolu;
15 Kia iloa ai kua mahani tonu a Iehova; ko e haku a maka tumau, nakai ha ia ia foki ha mahani kelea.