Tau Salamo 94:1-23
94 IEHOVA na e, ko e Atua ke taui, ko e Atua ke taui, kia fakakikila mai a.
2 Kia tu ki luga a koe ko e fakafili he lalolagi; kia āge e koe e taui kia lautolu kua fakatokoluga.
3 Iehova na e, to hula ato a fe e tau tagata mahani kelea? to hula ato a fe e tau tagata mahani kelea?
4 Kua vagahau fakahanoa, kua vagahau fakahakehake a lautolu, kua pola e lautolu a lautolu ni ko e tau tagata mahani kelea oti kana.
5 Iehova na e, kua lipilipi e lautolu hāu a motu, kua fakamamahi e lautolu hāu a tau tagata.
6 Kua kelipopo e lautolu e fifine takape mo e tagata kehe, kua kelipopo foki e lautolu e tau tama nakai fai matua.
7 Ti pehe ni a lautolu, Nakai kitia e Ioha, nakai manatu foki he Atua a Iakopo.
8 Kia iloa e mutolu, ko mutolu ne goagoa ke he motu; ti iloilo foki a fe a mutolu ne goagoa?
9 Ko ia ne eke e teliga, nakai kia logona e ia? ko ia ne eke e mata, nakai kia kitia e ia?
10 Ko ia ne fahi e tau motu kehe, nakai kia akonaki e ia? ko ia kua fakaako e tau tagata kia iloilo.
11 Kua fioia e Iehova e tau manatu he tau tagata, kua fakateaga a lautolu.
12 Ioha na e, uhoaki e tagata ne fahi e koe; mo e fakako e koe ke he hāu a fakatufono.
13 Kia tuku atu e koe e okioki kia ia ke he tau aho kelea, ato keli e koe e luo mo ia ne mahani kelea.
14 Ha ko e mena nakai toka e Iehova hana motu, ti nakai tiaki e ia hana fonua.
15 Ha ko e mena liu atu foki e fakafiliaga ke he tututonu; to mumui atu foki ki ai a lautolu oti kua loto fakamoli.
16 Ko hai ke matike mo au ke totoko ke he tau tagata mahani kelea? ko hai ke tu atu mo au ke totoko kia lautolu kua eke mena kelea?
17 Aua e lagomatai mai e Iehova kia au, po kua toe tote ti nofo ai haku agaga ke he mena nakai lea ai taha.
18 Ka pehe atu au, Kua heke haku hui, ti toto hake ai au he hāu a fakaalofa, Iehova na e.
19 Ko e tau manamanatu loga he haku a loto kua fiafia ai au ha ko e fakamafanaaga mai ia koe.
20 To fakalataha mo koe kia e nofoaiki ha i ai e favale, ko ia kua eke e fakatufono ke fakamamahi.
21 Kua feoho mai a lautolu ke he tagata tututonu kia mate ai a ia; kua fakahala e lautolu e tagata kua nakai hala.
22 Ka kua eke a Iehova mo kolo tokoluga māku; ko e haku Atua foki ko e maka tumau ke malu ai au.
23 To taui foki e ia kia lautolu ha lautolu a hepehepe, to fakahiku foki e ia a lautolu ke he ha lautolu a mahani kelea; ko Iehova, ha mautolu a Atua to fakahiku e ia a lautolu.