Tau Salamo 98:1-9
98 KIA lologo atu a mutolu kia Iehova ke he lologo fou; ha ko e tau mana ne eke e ia; ko e hana lima matau, ko e hana lima tapu kua eke ai e fakamouiaga.
2 Kua fakailoa mai e Iehova hana ni a fakamouiaga: kua fakakite hana tututonu ki mua he tau motu kehe.
3 Kua manatu mai e ia ke he hana fakaalofa mo e hana fakamoli ke he faoa a Isaraela; kua kitia e tau kala oti he lalolagi e fakamouiaga mai he Atua ha tautolu.
4 Kia kalaga kia Iehova e lalolagi oti; kia leo lahi mo e kalaga fiafia mo e uhu lologo.
5 Kia uhu lologo a mutolu kia Iehova ke he kitara; ke he kitara mo e leo he lologo.
6 Ko e tau pu mo e leo he sofaro kia kalaga ai a mutolu ki mua a Iehova e Patuiki.
7 Kia go mai e tahi, katoa mo e tau mena kua puke ai, ko e lalolagi katoa mo lautolu kua nonofo ai.
8 Kia pati lima e tau vai lele, kia kalaga fakalataha e tau mouga mo e fiafia,
9 Ki mua a Iehova; ha kua haele mai a ia ke fakafili e lalolagi; ke fakafili e lalolagi mo e tututonu, ko e tau motu foki mo e tonu.