Teutaronome 11:1-32
11 HANAI, kia fakaalofa atu a koe kia Iehova hau a Atua, mo e omaoma a koe ke he hana fekau, mo e hana tau fakatufono, mo e hana tau fakafiliaga, mo e hana tau poaki ke he tau aho oti ni.
2 Kia iloa ai foki e mutolu ke he aho nai, ha ko e mena nakai vagahau atu e au ke he fanau ha mutolu, nakai iloa e lautolu a koe, mo e nakai kitekite ai e lautolu ke he tau akonakiaga a Iehova ha mutolu a Atua, ko e hana lilifu, mo e hana lima malolo, mo e hana lima fakaolo,
3 Mo e hana tau fakamailoga, mo e hana tau gahua ne eke ai e ia i Aikupito kia Farao ko e patuiki a Aikupito, katoa mo e hana motu oti;
4 Mo e tau mena ne eke e ia ke he kau a Aikupito, ke he ha lautolu a tau solofanua mo e ha lautolu a tau kariota, ne fakapuā ai e ia e puke tahi he Tahi Kula ki luga ia lautolu he tutuli mai e lautolu a mutolu; ti fakamahakava ai e Iehova a lautolu, ke hoko mai ni ke he aho nai.
5 Mo e tau mena ne eke e ia ma mutolu ke he tutakale, he o mai a mutolu ato hohoko mai a mutolu ke he mena nai;
6 Katoa foki mo e tau mena ne eke e ia kia Tatano mo Apiramo ko e tau tama a Eliapo, ko e tama a Reupena, ne fakamaga ai he kelekele hana gutu mo e folo fua ai a lautolu, mo e ha lautolu a tau magafaoa, mo e ha lautolu a tau fale ie, katoa mo e ha lautolu a tau mena oti ki mua a Isaraela oti ni;
7 Ko e mena kitekite atu ni ha mutolu a tau mata ke he tau mena lalahi oti ne eke e Iehova.
8 Ko e hanai kia omaoma a mutolu ke he tau poaki oti ni kua poaki atu ai e au kia mutolu ke he aho nai, kia malolo ai a mutolu ke hohoko atu a mutolu, mo e eke ma mutolu e motu kua o atu ai a mutolu ke eke ma mutolu;
9 Kia nonofo muatua ai a mutolu ke he motu ne omonuo ai e Iehova ke he ha mutolu a tau matua ke foaki atu ai kia lautolu mo e ha lautolu a fanau, ko e motu kua tafe ai e puke huhu mo e meli.
10 Ko e motu kua fina atu a koe ki ai ke eke māu, nakai tuga ne motu ko Aikupito ia ne o mai ai a mutolu, ne gana ai e koe hau a tau fua saito, ti fakamalū aki ke he hau a hui, tuga ne kaina ne to ai e tau lakau ikiiki ke kai.
11 Ka ko e motu kua o atu ki ai a mutolu ke eke ma mutolu, ko e motu haia ne ha i ai e tau mouga mo e tau pahua ne inu ni e ia e vai uha mai he lagi.
12 Ko e motu ne leveki e Iehova hau a Atua, kua kitekite mau ki ai a Iehova hau a Atua ke kamata mai he kamataaga he tau ti hoko atu ni ke he fakahikuaga he tau.
13 Kaeke foki ke fanogonogo fakamitaki a mutolu ke he tau poakiaga kua poaki atu ai e au kia mutolu ke he aho nai, kia fakaalofa atu a mutolu kia Iehova ha mutolu a Atua, mo e fekafekau ai a mutolu kia ia mo e ha mutolu a tau loto katoa mo e ha mutolu a tau agaga katoa.
14 Ti foaki atu ai e au e uha ke he ha mutolu a motu ke he hana ni a vaha, ko e uha fakamua mo e uha fakamui, ti tatanaki ai e koe hau a tau fua saito, mo e hau a uaina, mo e hau a puke lolo.
15 To foaki atu foki e au e tau akau ikiiki ke he hau a fonua ma e hau a tau manu; to kai ai foki e koe mo e makona ai.
16 A mutolu, neke fakavai ha mutolu a tau loto, ke o kehe ai mo e fekafekau ai a mutolu ke he tau atua kehe mo e fakaveveli fakafohifo ai kia lautolu;
17 Ti tupu ai e ita a Iehova kia mutolu ti papa ai e ia e lagi, ke aua neke to ai e uha, ti nakai fua mai ai e kelekele hana tau fua; ti mahaikava alumaki a mutolu mai he motu mitaki kua foaki mai ai e Iehova kia mutolu.
18 Hanai, kia tuku e mutolu e tau kupu nai ke he ha mutolu a tau loto mo e ha mutolu a tau manatu, ti pipi ai foki mo fakamailoga ke he ha mutolu a tau lima, ke eke foki mo foupapa ke he vaha he ha mutolu a tau mata.
19 Kia fakaako atu ai ke he fanau ha mutolu mo e vagahau ai ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ni ka matike a koe.
20 Kia tohi ai foki ke he tau pou he hau a fale, katoa mo e tau gutuhala;
21 Kia fakaloga ai ha mutolu a tau aho mo e tau aho he fanau ha mutolu ke he motu ne omonuo ai e Iehova ke he ha mutolu a tau matua ke foaki atu ai kia lautolu, ke tuga ne tau aho ke ha i ai e lagi ki luga he lalolagi.
22 Ha ko e mena kaeke ke omaoma a mutolu ke he tau poakiaga oti nai kua poaki atu ai e au kia mutolu ke eke, ke fakaalofa atu kia Iehova ha mutolu a Atua, ke o atu ai ke he hana tau puhala oti ni, mo e pipiki atu kia ia;
23 Ti vega kehe ai e Iehova e tau motu oti ia ki mua ha mutolu, to eke foki e mutolu ma mutolu e tau motu ne mumua kia mutolu he tokologa mo e malolo.
24 To eke ma mutolu e tau mena oti ni ke taholi ai he tau aloalohui ha mutolu; ke kamata mai he tutakale ke hoko atu ki Lepanona, ka kamata mai foki he vailele ko e vailele ko Eufirate ke hoko atu ke he tahi ke he fahi lalo, to eke ia mo tau katofia ha mutolu.
25 Ti nakai tu mai ha tagata ke totoko atu kia mutolu, to tuku e Iehova ha mutolu a Atua e matakutaku mo e hopo ate ke he tau motu oti ni ke o ki ai a mutolu, tuga ne talahau mai a ia kia mutolu.
26 Kitiala, kua tuku atu e au kia mutolu ke he aho nai e monuina mo e malaia;
27 Ko e monuina ka fanogonogo mai a mutolu ke he tau poakiaga a Iehova ha mutolu a Atua kua poaki atu ai au kia mutolu ke he aho nai;
28 Ka ko e malaia kaeke ke nakai fanogonogo a mutolu ke he tau poakiaga a Iehova ha mutolu a Atua, ka e o kehe a mutolu he puhala kua poaki atu ai e au kia mutolu ke he aho nai, ke mumui atu ai ke he tau atua kehe kua nakai iloa e mutolu.
29 Ka oti he fakahoko atu ai e Iehova hau a Atua a koe ke he motu ke fano a koe ki ai ke eke mau, ti tuku ai e koe e monuina ke he mouga ko Keresema, mo e malaia ke he mouga ko Evalu.
30 Nakai kia ha i ai e tau mouga ia ke he fahi atu a Ioritana ke he fahi hifo ai e la, ke he motu he tau tagata Kanana ne nonofo ke he kelekele tatai ne fehagai mo Kilikala, ne tata age ke he aluna a Morē?
31 Ha ko e mena o a mutolu ke he fahi atu a Ioritana ke hoko atu ke eke ma mutolu e motu kua foaki mai ai e Iehova ha mutolu a Atua kia mutolu, to eke foki ia ma mutolu, mo e nonofo ai a mutolu,
32 Kia taofi e mutolu ke eke ai e tau fakatufono oti, mo e tau fakafiliaga oti kua tuku atu ai e au ki mua ha mutolu ke he aho nai.