Teutaronome 13:1-18
13 KAEKE ke tu mai ia koe e perofeta, po ke tagata fa miti, ti foaki atu e ia kia koe ha fakamailoga po ke mana,
2 Ka hoko foki e fakamailoga po ke mana ne vagahau atu a kia koe, kua pehe, Kia mumui atu a tautolu ke he tau atua kehe, ko e tau atua nakai iloa e mutolu, mo e fekafekau a mutolu ki ai.
3 Aua neke fanogonogo a koe ke he tau kupu he perofeta ia, po ke tau kupu hana ne fa miti; ha kua kamatamata ai e Iehova ha mutolu a Atua a mutolu, ke kitia po ke fakaalofa atu nakai a mutolu kia Iehova ha mutolu a Atua mo e ha mutolu a tau loto katoa mo e ha mutolu a tau agaga katoa.
4 Kia mumui atu a mutolu kia Iehova ha mutolu a Atua, mo e matakutaku a mutolu kia ia, ti omaoma a mutolu ke he hana tau poaki, kia fanogonogo foki a mutolu ke he hana leo, ti fekafekau a mutolu kia ia, mo e pipiki atu kia ia.
5 Ka ko e perofeta na, po ke tagata fa miti na, kia kelipopo a ia; ha kua vagahau ai a ia ke o kehe a mutolu ia Iehova ha mutolu a Atua, ko ia ne ta mai a mutolu he motu ko Aikupito mo e laveaki mai e ia a koe he mena ne nofo fakatupa ai a koe, kia tulei kehe e ia a koe he puhala ne poaki mai e Iehova hau a Atua ke fano ai a koe. Ti tuku kehe ia e kelea ia koe.
6 Kaeke ke fakaohoho fufu a koe he hau a matakainaga, ko e tama he hau a matua fifine, po ke hau a tama tane, po ke hau a tama fifine, po ke hau a hoana fakahele, po ke hau a kapitiga kua ofania e koe kua pehe atu, kia o a tautolu mo e fekafekau ke he tau atua kehe, nakai iloa, ko koe, mo e hau a tau matua;
7 Ko e tau atua he tau motu ne agaagai kia mutolu, po ke fetataaki mo koe, po ke vaha mamao mo koe, ke kamata mai he taha fahi he lalolagi ke hoko atu ke he taha fahi he lalolagi;
8 Aua neke loto a koe kia ia, ti ua fanogonogo a koe kia ia; aua neke fakaalofa a koe kia ia, aua neke hagao atu a koe kia ia, ti aua foki neke fufu e koe a ia.
9 Ka kia kelipopo e koe a ia, kia hoko mua hau a lima kia ia ke kelipopo a ia, ti hoko fakamui kia ia he tau lima he motu oti ni.
10 Kia pini a ia ke he tau maka ke matepopo ai a ia; ha kua eke ni e ia ke tulei kehe a koe ia Iehova hau a Atua, ko ia ne ta mai a koe he motu ko Aikupito, ko e mena ne nofo fakatupa ai a koe.
11 Ti fanogonogo ai a Isaraela oti ni, mo e matakutaku ai, ti nakai liu foki eke ai e lautolu ha mena kelea pehenā ke he ha mutolu a motu.
12 Kaeke ke logona e koe ha kupu ke he taha maga hau, kua foaki mai e Iehova hau a Atua kia koe ke nofo ai, kua pehe mai,
13 Kua o atu e tau tagata, ko e tau tagata matahavala, he motu ha mutolu, kua uhu kehe e lautolu a lautolu kua nonofo ke he maga ha lautolu, kua pehe age, Kia o a tautolu, mo e fekafekau ai a tautolu ke he tau atua kehe kua nakai iloa e mutolu;
14 Ti huhu ai e koe, mo e kumikumi ai, mo e huhu fakamakutu ai ke he mena ia; kitiala foki, kaeke kua moli e tala ia, kua kitia mali ni, ne eke ai e mena fakalialia na kia mutolu;
15 Ti kelipopo ai e mutolu ke he pelu a lautolu oti kua nonofo ke he maga ia, kia fakaotioti ni ke he pelu e tau mena oti ha i ai, katoa mo e tau manu ha i ai.
16 Ko e tau koloa oti foki ha i ai kia tatanaki ia ke he loto male hana; ti huhunu ai e koe e maga ke he afi, katoa mo e tau koloa oti ha i ai, kia oti ai ni kia Iehova hau a Atua; ti eke foki ia mo tumutumu tukulagi ni; nakai ni liu ati ai.
17 Aua neke pipiki atu ke he hau a lima ha mena taha he tau mena kua tuku atu ai; kia liliu kehe ai e Iehova hana ita lahi, mo e fakaalofa mai a ia kia koe, mo e fakaalofa hofihofi kia koe, mo e fakatokologa ai e ia a koe tuga ne omonuo ai e ia ke he hau a tau matua;
18 Ka kua fanogonogo ai a koe ke he leo a Iehova hau a Atua, ke omaoma ai ke he hana tau poaki oti, kua poaki atu ai e au kia koe ke he aho nai, kia eke ai e koe e tau mena kua tonu ki mua a Iehova hau a Atua.