Teutaronome 15:1-23
15 KA hoko ke he tau fitu ti eke ai e koe e tokanoaaga.
2 Hanai, kia eke ai pehe e tokanoaaga; ke takitaha e tagata kua ta age mena ke he tagata ne katotia mo ia ke totogi kia foaki noa atu kia ia; aua neke fakamakamaka atu a ia, ke totogi mai he tagata kua katofia mo ia, po ke hana matakainaga; ha ko e mena talahaua ai ko e tokanoaaga a Iehova.
3 Kia fakamakamaka atu ke he tagata kehe; ka ko e tau mena hau ha he matakainaga hau aua neke fakamakamaka atu ki ai;
4 Ke aua neke ha ha ia koe ha tagata nofogati; ha ko e mena fakamonuina fakalahi e Iehova e motu kua foaki mai ai e Iehova hau a Atua kia koe ko e tufaaga ke moua ni māu;
5 Kaeke ni ke fanogonogo fakamitaki a koe ke he leo a Iehova hau a Atua, kia taofi ke eke ai e tau poaki oti nai kua poaki atu ai au kia koe ke he aho nai.
6 Nukua fakamonuina ai e Iehova hau a Atua a koe tuga ne vagahau ai a ia kia koe; to ta age foki e koe e tau mena ke he tau motu loga, ka e nakai ogo mena mai e koe; to pule foki a koe ke he tau motu loga, ka e nakai pule a lautolu kia koe.
7 Kaeke ke ha ia koe ha tagata nofogati he hau a tau matakainaga ke he taha maga he hau a motu kua foaki mai ai e Iehova hau a Atua kia koe, aua neke fakamao atu e koe hau a loto kia ia, po ke kuku hau a lima ke he hau a matakainaga nofogati;
8 Ka kia fofola atu ni e koe hau a lima kia ia, mo e ta atu kia ia ke lata mo e hana nofogati, ne nofogati ai a ia.
9 A koe, neke ha ha he loto kelea hau ha kupu, kua pehe hifo, Kua tata mai e tau fitu ko e tau he tokanoaaga haia, ti kelea hau a mata ke he hau a matakainaga nofogati, mo e nakai ta age e koe ha mena kia ia, ti ui atu e ia kia Iehova ha ko koe, ti eke ia mo hala kia koe.
10 Kia foaki age ni e koe kia ia, ti aua neke ta age ai e koe mo e mamahi he hau a loto; ko e tau mena ia ni ke fakamonuina ai e Iehova, hau a Atua a koe ke he hau a tau gahua oti, mo e tau mena oti ni ke eke ai hau a tau lima.
11 Ha ko e mena nakai noa e motu mo e tau tagata nonofogati ha ha i ai; ko e mena ia ne poaki atu ai au kia koe, kua pehe atu, Kia fofola atu e koe hau a lima ke he hau a matakainaga, kia ia kua matematekelea, mo ia kua nofogati ke he hau a motu.
12 Ka fakafua mai e koe hau a matakainaga ko e tagata Heperu ko e tane, po ke tagata Heperu ko e fifine, ti fekafekau ai a ia kia koe ke he tau tau ne ono; ka hoko ke he tau fitu ti tokanoa atu e koe a ia ke fano ia koe.
13 Ka tokanoa e koe a ia ke fano, aua neke fakafano atu e koe a ia ia koe mo e nakai fai mena;
14 Ka kia foaki atu e koe kia ia mai hau a fuifui mamoe, mo e falu a mena mai he mena kua taholi ai hau a saito mo e hau a holiaga vine; kia foaki atu e koe kia ia he tau mena kua fakamonuina ai a koe e Iehova hau a Atua.
15 Kia manamanatu foki ne eke ai a koe mo fekafekau ke he motu ko Aikupito, ti laveaki mai foki e Iehova hau a Atua a koe; ko e mena ia kua poaki atu ai e au e mena na kai koe ke he aho nai.
16 Ka pehe mai foki a ia kia koe, Nakai fano kehe au ia koe; ha kua fakaalofa a ia kia koe mo e hau a magafaoa, ti mitaki foki kia ia ke fakalataha mo koe;
17 Ti uta e koe e huki, mo e huki aki hana teliga ke he pahala, ti eke ai a ia mo fekafekau kia koe tukulagi. Ti eke ai pihia hau a fekafekau fifine.
18 Aua neke uka kia koe ke tokanoa a ia ke fano ia koe, ha ko e mena eke ni a ia kia koe ke tatai mo e tokoua e fekafekau palepale, ke he hana a fekafekau ai kia koe ke he tau tau ne ono; ti fakamonuina ai e Iehova hau a Atua a koe ke he tau mena oti ke eke ai e koe.
19 Ko e tau punua uluaki oti ni, ko e tau punua tane ke fanau mai he hau a fuifui povi mo e hau a fuifui mamoe to fakatapu ai e koe ma Iehova hau a Atua; aua neke eke gahua a koe ke he punua uluaki he hau a povi, ti aua neke hifi e koe e punua uluaki he hau a mamoe.
20 To kai ai ni e koe ki mua a Iehova hau a Atua ke he taha tau mo e taha tau ke he mena ke fifili ai e Iehova, ko koe katoa mo e hau a magafaoa.
21 Kaeke ke ha i ai ha mena ke ila ai, ko e kulikuli, po ke matapouli, po ke ila kelea, aua neke eke ia mo poa kia Iehova hau a Atua.
22 Kia kai ai a ia ke he māga hau; ti kai ai e ia kua nakai mea mo ia kua mea, ke tuga ne sevi mo e aila.
23 Ka e aua neke kai ai e koe hana toto; kia liligi ia ke he kelekele po ke magavai.