Teutaronome 16:1-22
16 KIA taofi e koe e mahina ko Apipa, ke eke ai e paseka kia Iehova hau a Atua; ha ko e mahina ko Apipa ne ta mai ai e Iehova hau a Atua a koe ke he po i Aikupito.
2 Kia keli ai e koe e paseka kia Iehova hau a Atua, ko e tau mamoe mo e tau povi, ke he mena kua fifili ai e Iehova ke tuku ai hana higoa.
3 Aua neke kai ai a koe mo e areto fakaea; po fitu ni ke kai ai a koe mo e areto nakai fakaea, ko e areto he mamahi; ha ko e mena hau ai fakatepetepe a koe he motu ko Aikupito; kia manatu ai e koe ke he aho ne hau ai a koe he motu ko Aikupito ke he tau aho oti he hau a moui.
4 Aua neke kitia ai ha mena ke fakaeaaki ke he motu oti ke he tau aho ne fitu; aua neke tokai foki ha maga kakano he mena ne eke ai e koe mo poa ke he afiafi he aho fakamua.
5 Nakai maeke ke keli ai e paseka ke he taha maga hau kua foaki mai ai e Iehova hau a Atua kia koe;
6 Ka ko e mena hokoia ni ke fifili ai e Iehova hau a Atua ke tuku ai hana higoa, ko e mena ia ke keli ai e paseka ke he afiafi, ke he magaaho ke to ai e la, ko e magaaho ia ne hau ai a koe i Aikupito
7 Kia tunu ni, mo e kai ai e koe ke he mena ke fifili ai e Iehova hau a Atua, ka hoko ke he aho a pogipogi ti liu ai a koe, mo e fina atu ke he hau a fale ie.
8 Po ono ke kai ai e koe e areto nakai fakaea; ka ko e aho fitu ke eke ai e fakapotopotoaga kia Iehova hau a Atua; aua neke eke ai e koe ha gahua taha.
9 Kia totou e koe fitu e vaha tapu; kia kamata ai ke totou e tau fahi tapu ne fitu ka kamata ai ke tuku atu e helesaito ke he tau saito kua tu.
10 Ti eke ai e koe e galue he tau vaha tapu kia Iehova hau a Atua, ko e mena ne makai ki ai hau a loto, ke uta ai e koe, ke lata mo e mena kua fakamonuina ai a koe e Iehova hau a Atua.
11 Ti fiafia ai a koe ki mua a Iehova hau a Atua ke he mena ke fifili ai e Iehova hau a Atua ke tuku ai hana higoa, ko koe, mo e hau a tama tane, mo e hau a tama fifine, mo e hau a fekafekau tane, mo e hau a fekafekau fifine, mo e tagata Levi ha he maga hau, ko e tagata kehe foki, mo ia kua nakai fai matua, mo e fifine takape, ha ha ia koe.
12 Kia manamanatu foki a koe, ne eke a koe mo fekafekau ki Aikupito, ti omaoma a koe ti eke ai e koe e tau fakatufono nai.
13 Kia eke ai e koe e galue he tau fale api ke he aho fitu, ka kua oti he tatanaki ai hau a tau fua saito, mo e hau a uaina;
14 Ti fiafia ai a koe ke he hau a galue, ko koe, mo e hau a tama tane, mo e hau a tama fifine mo e hau a fekafekau tane, mo e hau a fekafekau fifine, mo e tagata Levi, mo e tagata kehe, mo ia kua nakai fai matua, mo e fifine takape ha ha he maga hau.
15 Ko e tau aho ni ne fitu ke eke ai e koe e galue kia Iehova hau a Atua ke he mena ke fifili ai e Iehova; ha ko e mena to fakamonuina e Iehova hau a Atua a koe ke he tau mena oti ke moua mai e koe, mo e tau mena oti ke eke ai hau a tau lima, ti fiafia ai ni a koe.
16 Taki lagatolu ke he tau tau ke kitia ai e tau tane oti ha ia koe ki mua a Iehova hau a Atua ke he mena ke fifili ai e ia; ko e galue he tau areto nakai fakaea, mo e galue he tau vaha tapu, mo e galue he tau fale api; ti aua neke kitia ai taha ki mua a Iehova kua nakai fai mena.
17 Kia takitaha e tagata ke lata mo e tau mena ha ha ia ia, ke lata mo e monuina kua foaki mai ai e Iehova hau a Atua kia koe.
18 Kia kotofa e koe māu falu ke eke mo tau fakafili mo tau takitaki foki ke he hau a tau māga oti, kua foaki mai ai e Iehova hau a Atua kia koe, ke he hau a tau magafaoa oti, ke fakafili ai foki e lautolu e motu mo e fakafiliaga tonu.
19 Aua neke fakakeukeu e koe e fakafiliaga; ti aua neke fakamailoga tagata, ti aua foki neke talia e koe e mena fakaalofa; ha ko e mena fakaalofa ke fakapouliaki e tau mata he tau tagata iloilo, ko ia foki ke hepehepe ai e tau kupu he tau tagata tututonu.
20 Kia tutuli atu e koe ke he tau mena ni kua tonu, kia moui ai a koe, ke eke foki māu e motu kua foaki mai ai e Iehova hau a Atua kia koe.
21 Aua neke fakatu ai ha tupua Asaira, po ke taha akau ke tata age ke he fatapoa a Iehova hau a Atua, ke eke ai māu.
22 Ti aua neke fakatu e koe ha tupua māu, ko e mena kua vihiatia e Iehova hau a Atua.