Teutaronome 17:1-20
17 AUA neke eke ai e koe mo poa kia Iehova hau a Atua ha povi po ke mamoe ne ha i ai ha ila, po ke mena kelea; ha ko e mena fakalialia haia kia Iehova hau a Atua.
2 Kaeke ke moua ai e koe, ke he taha he tau maga hau kua foaki mai ai e Iehova hau a Atua kia koe, ko e tane po ke fifine kua eke e tau mena kelea ki mua a Iehova hau a Atua, ke holi ai hana maveheaga;
3 Kua fano a ia mo e fekafekau ai ke he tau atua kehe, mo e fakaveli fakafohifo ki ai, ko e la, po ke mahina, po ke taha he kau he lagi kua poaki ai e au ke ua eke;
4 Ti tala atu ai kia koe ti fanogonogo ai a koe, mo e kumi fakamitaki ai e koe, kitiala foki, kua moli kua fakamoli ai e mena, kua eke ai ni e mena fakalialia na i Isaraela;
5 Ti uta ai e koe ke he hau a tau gutuhala e tane na po ke fifine kua eke ai e mena kelea na, ti tauliti maka ai e tane ia po ke fifine ia, ke matepopo.
6 Ko e tau kupu he tau tagata ke talahau ne tokoua, po ke tokotolu kua talahau mena ki ai ke kelipopo ai a ia, nakai kelipopo e koe a ia ke he kupu he tagata ke talahau ne tokotaha.
7 Kia hoko fakamua he tau lima he tau tagata ne talahau e tau mena kia ia ke kelipopo a ia; ka e fakamui e tau lima he motu oti ni, Ti tuku kehe ia e kelea ia koe.
8 Kaeke foki ke fai mena kua uka kia koe ke fakafili ke he toto mo e toto, ko e fakafiliaga mo e fakafiliaga ko e ta mo e ta, ko e tau mena kua taufetoko ai ke he hau a maga; ti matike a koe mo e hake ai ke he mena ke fifili ai e Iehova hau a Atua mana;
9 Ti fano ai a koe ke he tau ekepoa, ko e tau tagata Levi, mo e fakafili ha i ai ke he vaha ia, ti huhu ai e koe kia lautolu; ti tala atu ai e lautolu kia koe e tonu he mena ke fakafili ai;
10 Ti eke e koe tuga ne mena ke tala atu ai e lautolu kia koe ke he mena kua fifili ai e Iehova; ti omaoma a koe ke eke tuga ne tau mena oti ke fakakite mai ai e lautolu kia koe;
11 Kia eke ai e koe ke lata mo e fakatufono ke fakakite atu ai e lautolu kia koe, ke lata foki mo e fakafiliaga ke eke ai e lautolu kia koe; aua neke fano kehe a koe mo e kupu kua tala atu ai e lautolu kia koe, aua neke fano a koe ke he fahi matau, po ke fahi hema;
12 Ko e tagata foki kua eke mena mo e fakatokoluga, mo e nakai fia fanogonogo ke he ekepoa kua tu ke he mena tapu ke fekafekau ai kia Iehova hau a Atua, po ke fakafili, kia mate ai e tagata na, ti tuku kehe ai e koe e kelea ia Isaraela.
13 Ti fanogonogo ai e motu oti ni, mo e matakutaku ai, ti nakai liu ke fakatokoluga ai.
14 Ka hoko atu foki a koe ke he motu kua foaki mai ai e Iehova hau a Atua kia koe, mo e eke ai māu, ti nofo ai a koe, ti pehe age a koe, To fakatu e au maku ha patuiki, ke tuga ne tau motu oti kua agaagai mai kia au;
15 Kia fakatu e koe e patuiki māu kua fifili ai e Iehova hau a Atua; kia fakatu e koe taha mai he tau matakainaga hau ke eke mo patuiki mau; nakai maeke ke kotofa ai e koe e tagata kehe nakai ko e matakainaga hau ke eke mo patuiki hau.
16 Ka e aua neke fakaloga ai e ia e tau solofonua māna, ti aua neke liuaki atu e ia e motu ki Aikupito, kia fakaloga ai e ia e tau solofonua; ha kua pehe mai a Iehova kia mutolu, Aua neke liliu atu foki a mutolu ke he puhala ia.
17 Aua neke fakaloga ai foki e ia e tau hoana māna, neke liliu kehe ai e lautolu hana loto; ti aua neke tanaki fakaloga ai e ia e tau ario mo e tau auro mana.
18 Ka nofo foki a ia ke he nofoaiki he hana kautu, ti tohi ai e ia mana e tohi he fakatufono nai mai he tohi na ha i mua he tau ekepoa ko e tau tagata Levi;
19 Kia ha ia ia e tohi ia, kia totou ai e ia ke he tau aho oti he hana moui; kia fakaako a ia ke matakutaku ai kia Iehova hana Atua; mo e omaoma ni a ia ke he tau kupu oti he fakatufono nai mo e tau poakiaga nai ke eke ai e ia;
20 Neke fakatokoluga ai hana loto ke he hana tau matakainaga, ti fano kehe ai a ia mo e poakiaga, ke he fahi matau po ke fahi hema; kia loga ai e tau aho hana ke he kautu, ko ia, mo e hana tau tama tane, i Isaraela.