Teutaronome 18:1-22
18 KO e tau ekepoa ko e tau tagata Levi, mo e magafaoa oti a Levi, nakai fai fonua a lautolu ti nakai fai tufaaga a lautolu fakalataha mo Isaraela; ko e tau poa kua eke ke he afi kia Iehova, ko e hana tufaaga haia ke kai ai e lautolu.
2 Nakai fai tufaaga a ia mana fakalataha mo e hana tau matakainaga; ko Iehova ko e hana tufaaga a ia, tuga ne vagahau mai a ia kia ia.
3 Ko e tau mena nai kua lata ke moua ai he tau ekepoa ma lautolu mai he tau motu, ia lautolu kua eke poa, ko e tau povi po ke tau mamoe; kia ta age e lautolu ke he ekepoa e lima, mo e na kauloa ua, mo e fatu.
4 Ko e tau fua uluaki he hau a saito, ko e hau a uaina, mo e hau a puke lolo, katoa mo e heleaga fakamua he tau fulu he hau a fuifui mamoe, kia ta age ai e tau mena ia kia ia,
5 Ha ko e mena fifili e Iehova hau a Atua a ia mai he tau magafaoa oti, ke tu mo e fekafekau ai ke he higoa a Iehova, ko ia mo e hana tau tama tane ke he tau aho oti ni.
6 Kaeke foki ke hau ai e tagata Levi he taha maga he tau maga oti i Isaraela, ne nofo ai a ia; ka hau a ia mo e manako katoatoa he hana loto ke he mena ke fifili ai e Iehova;
7 Ti fekafekau ai a ia ke he higoa a Iehova hana Atua, tuga hana tau matakainaga oti ko e tau tagata Levi, kua tutu ai ke he mena ia ki mua a Iehova.
8 Kia tatai he lautolu a tau tufaaga ke kai ai, ka e kehe ni e fakafua he tau mena ha ko e tau matua.
9 Ka hoko atu a koe ke he motu kua foaki mai ai e Iehova hau a Atua kia koe, aua neke ako ai a koe ke eke tuga ne tau mena fakalialia he tau motu ia.
10 Aua neke kitia ia koe taha kua fakafano age hana tama tane po ke hana tama fifine ki loto he afi, ko e taha kua talahau mena he kitekite ke he tau aolagi, po ke taha kua kumi ke he tau fakamailoga, po ke taha taulatua,
11 Po ke tagata fakavai gata, po ke taha kua kumi ke he tau atua, po ke taha ne ha i ai e tau agaga talahau tuai, po ke taha kua kumi atu kia lautolu ne mamate.
12 Ha kua vihiatia e Iehova a lautolu oti kua eke e tau mena ia; ko e tau mena fakalialia foki ia kua vega kehe ai e Iehova hau a Atua a lautolu ki mua hau.
13 Kia mahani hakohako a koe ki mua a Iehova hau a Atua.
14 Ha ko e tau motu nai, ke eke e koe mau, kua fanogonogo a lautolu ke he tau tagata kua talahau mena he kitekite ke he tau aolagi, mo lautolu kua eke e tau lagatau he tau taulaatua; ka ko koe nakai ni maeke kia Iehova hau a Atua ke eke pihia e koe.
15 To fakatu mai e Iehova hau a Atua ia koe, he hau a tau matakainaga, ha perofeta māu ke tuga au nai; to fanogonogo a mutolu kia ia;
16 Tuga ne tau mena oti ne ole e koe ia Iehova hau a Atua i Horepa ke he aho he fakapotopotoaga, ne pehe mai, Aua neke liu fanogonogo au ke he leo a Iehova haku a Atua, ti aua neke liu kitekite au ke he afi lahi na, neke mate au.
17 Ti pehe mai a Iehova kia au, Kua mitaki a lautolu he mena kua vagahau mai ai e lautolu.
18 To fakatu e au ma lautolu, he tau matakainaga ha lautolu ha perofeta tuga na koe; to tuku atu foki e au haku a tau kupu ke he hana gutu, ti vagahau atu e ia kia lautolu e tau mena oti ni, ke poaki atu ai e au kia ia.
19 Ko e tagata foki ke nakai fanogonogo ke he haku a tau kupu, kua vagahau atu e ia ke he haku a higoa, ti kumi atu e au, ko au ni, e mena ia kia ia.
20 Ka ko e perofeta kua fakatokoluga mo e talahau ai e tau kupu ke he haku a higoa, nakai poaki atu ai e au kia ia ke talahau, po ke vagahau ai ke he tau higoa he tau atua kehe, to mate ai ni e perofeta ia.
21 Kaeke foki ke pehe a koe ke he hau loto, To iloa fefe e mautolu e kupu kua nakai vagahau mai ai a Iehova?
22 Ka vagahau ai ha perofeta ke he higoa a Iehova, kaeke ke nakai hoko e mena, nakai fakamoli foki, ko e kupu haia nakai vagahau mai ai a Iehova; ko e fakatokoluga he perofeta ia kua vagahau ai a ia, aua neke matakutaku a koe kia ia.