Teutaronome 20:1-20
20 KA fina atu a koe ke tau kia lautolu kua fai fi kia koe; ti kitia atu e koe e tau solofanua, mo e tau kariota, mo e motu ne mua he tokologa kia koe, aua neke matakutaku a koe kia lautolu; ha kua ha ia koe a Iehova hau a Atua, ko ia ne ta hake a koe he motu ko Aikupito.
2 Ka unuunu atu a mutolu ke tau, ti fakatata ai e ekepoa kia mutolu, mo e vagahau atu ke he motu,
3 Ke pehe atu a ia kia lautolu, Isaraela na e, kia fanogonogo mai a, ko e mena fakatata atu a mutolu ke he aho nai ke tau mo lautolu kua fai fi kia mutolu; aua neke fakalolelole ha mutolu a tau loto, aua neke matakutaku, aua neke fehola fakatepetepe ti aua neke vivivivi ai a mutolu ha ko lautolu;
4 Ha ko Iehova ko e ha mutolu a Atua kua o mo mutolu, ti tau a ia ma mutolu kia lautolu kua fai fi mai kia mutolu, ke fakamoui ai a mutolu.
5 Kia vagahau atu foki he tau takitaki ke he motu pehe, Ko hai kia e tagata kua ta e ia e fale fou ka e nakai la fakaulu ai e fale? kia fano a ia ti liu atu ai ke he hana fale, neke mate a ia ke he tau, ti fakaulu ai e taha tagata e fale.
6 Ko hai foki e tagata kua to e ulu vine, ka e nakaila kai e tau fua? kia fano a ia, ti liu atu ai ke he hana fale, neke mate a ia ke he tau, ti kai ai e taha tagata e tau fua he ulu vine.
7 Ko hai foki e tagata kua utu vagahau ke he fifine ke eke mo hoana hana, ke a nakaila fakalataha ai a laua? kia fano a ia, ti liu atu ai ke he hana fale, neke mate a ia ke he tau, ti eke ai e fifine mo hoana he taha tagata.
8 Kia liu foki vagahau atu he tau takitaki ke he motu, ti pehe atu a lautolu, Ko hai kia e tagata kua matakutaku mo e fakalolelole ai hana loto; kia fano a ia, mo e liu atu ai ke he hana fale, neke fakalolelole ai e tau loto he hana tau matakainaga tuga ne loto hana.
9 Ka oti foki he vagahau atu he tau takitaki ke he motu, ti kotofa ai e lautolu e tau iki he tau lā kau ke takitaki e motu.
10 Ka fakatata atu a koe ke he maga ke tau ki ai, ti ui atu a koe ki ai ke mafola,
11 Kaeke foki ke tali mai ai a lautolu kia koe, ke mafola, mo e hafagi ai e lautolu e tau gutuhala kia koe, ti eke ai e tau tagata oti ke moua ai mo tau tagata ke ta mai e tau poa kia koe, mo e fekafekau ai a lautolu kia koe.
12 Ka ko e mena ka nakai mafai a lautolu ke fakafeilo mo koe, ka e fia tau ni a lautolu mo koe, ti pa takai e koe a ia;
13 Ka tuku mai foki e Iehova hau a Atua a ia kia koe, ti kelipopo ai e koe e tau tane oti ni ha ha i ai ke he pelu;
14 Ka ko e tau fifine, mo e tau tama ikiiki, mo e tau manu huifa, mo e tau mena oti ha ha he maga, ko e tau koloa oti ni ha i ai to eke ia mo tau mena ne fofo he tau māu; ti kai ai e koe e tau mena oti ha lautolu ia ne fai fi kia koe, kua foaki mai e Iehova hau a Atua kia koe.
15 Kia eke pihia a koe ke he tau maga oti ne vaha mamao lahi mo koe, ka e nakai eke pihia ke he tau maga he tau motu na.
16 Ka ko e tau maga he tau motu na kua foaki mai e Iehova hau a Atua kia koe ke eke mo tufaaga, aua neke fakamoui ai e koe ha tagata taha.
17 Ka kia fakaotioti ni e koe a lautolu, ko e tau tagata Heti, mo e tau tagata Amori, ko e tau tagata Kanana, mo e tau tagata Perisi, ko e tau tagata Hivi, mo e tau tagata Iepusi; tuga ne poaki mai ai e Iehova hau a Atua kia koe;
18 Neke fakaako mai e lautolu a mutolu ke eke tuga ne tau mena fakalialia oti ha lautolu, kua eke ai e lautolu ke he ha lautolu a tau atua; ti hala ai a mutolu kia Iehova ha mutolu a Atua.
19 Kaeke foki ke pa takai ai e maga ke he tau aho loga ni, mo e tau ki ai ke moua ai, aua neke moumou ai hana tau akau he hio aki ke he toki, ha ko e tau mena ia ke kai ai e koe, aua neke hio ki lalo e koe ke eke aki e tau mena ke pa takai aki e maga (ha ko e akau he fonua ma e tau tagata haia).
20 Ka ko e tau akau kua iloa e koe nakai ko e tau akau ke kai ai haia ke moumou mo e hio ki lalo; ti eke aki foki e tau kolo ke fakafehagai mo e maga kua tau mo koe ato mahala ai a ia.